Australia Ato Kilonser tasenbai cabinet nung tetsür menden talila kümtsür

September 20 (Agencies): Australia Ato Kilonser Malcolm Turnbull-i tang aliba defense minister, Marise Payne menden zünga cabinet nung tetsürtem asoshi meden ana dang aliba pongu kümtsüogo.
Sorkar nung economics minister aser treasurer, Joe Hockey melen minister Scott Morrison shimokogo.
Yaküm May ita nung Hockey-i küm piyong indang budget benokba sülen party laoba tang tashi memokdakteter. Pai benokba budget ji sensakertemi asoshi tamakoktsü ta ser Senate ajanga ibaji shibanga ayu.
Liberal Party temi taoba Hombar aonung ajungbena tanishir melenteptsü asoshi vote agitetpa sülen taoba mapang communications minister alisang Turnbull ya Tony Abbott melena Ato Kilonser aküm.
Abbott ketdangsüba aitsütsü meji nung Turnbull-i, “Asen sorkari nüburtemi aginüba ama rongsen kettsüng nung takok ngua meiyakteter,” ta Hockey-i inyaksaba dak ajemdaker shia liasü.
Turnbull-i, “Hockey ya yimten nungi anenadoktsüla,” ta ashi.
Tan shima aliba cabinet 21 rongnung Abbott-a meshiok. Abbott mapang cabinet nung minister 19 dang liasü.
“Tanü ni century 21buba nung nüngdakba sorkar aser tarutsü ministry ka metetpelar,” ta Turnbull-i osangbenertem dang ashi.
2013 küm Abbott-i pa cabinet nung tetsür menden ka dang latettsüba atema nüburtemi nemjema bilema liasü. Iba mapang foreign minister, Julie Bishop kija cabinet nung liasü aser tatsüka lir külen health minister, Sussan Ley-a anioka liasü.
Julie aser Sussan naprongla Turnbull-i aniba sorkar nunga cabinet menden nungsa lir. Tena den ano Minister for Women Michaelia Cash, Payne aser Minister for Small Business, Kelly O’Dwyer nungera cabinet-i tang tasen aitsemogo.
Cabinet tasenba ya tanü, Hombar nü tenangzükba agitsü.