Australia-i ‘communications satellite’ amenogo

Sydney, October 1 (Agencies): Australia nungeri par linük ‘National Broadband Network’ atema satellite ana yangluba rongnungi ka tan takok ngua anünglak nung amenba ajanga Australia nung yimti aser jila nungi kanga pilar aliba nüburtem asoshi tang nungibo ‘high-speed internet’ angutsü atema jenjang tajungba akümer.

Iba satellite ya sen dollar billion tesadang ka endoka yanglu aser iba tenüng Sky Muster ta ajabaji arishi küm 6 tanur, Northern Territory nung kaketshir, Bailey Brooks-i jatsüba lir. Sky Muster ya Brihostibar nü French Guiana nungi kahketja liasü, ta Xinhua osangkaket ajanga sangdongogo.

National Broadband Network (NBN) nung otongdar, Frances Kearey-i, Sky Muster-i nangzükba ama inyaker asü meinyakerar alimai reprangdar, ta media dang shiogo.

“Iba ya alima nung ‘communication satellites’ tulutiba rongnung ka lir aser iba ya ajanga Australia linük tulu nung ‘broadband’ service agütsü nükjidong lir,” ta lai ashi.

Kearey-i, “National Broadband Network (NBN) satellite ajanga linük nung ‘high-speed internet’ agütsüba den külemi kaketshisatsü, temang anema aliyim, lokti sendaktepba aser business mapatem asoshi maongka tasen agütsüba nung yaritsü,” ta shisem.

Yimti aser jila nungi pilar aliba, Cocos, Christmas aser Norfolk Islands tesemtem nung alir tajemba agi nisung 200,000 den junga tetendanger külen, 2016 tashi nungibo sendaktepa akümtsü.

Internet speed second ka nung megabit 25 (mbps) tashi agütsütsü nangzüka alibaji item nisung 200,000 den sendaktepa akümba sülen ang ataloktettsü südi, ta mongintemi shiogo.