Australia-i Japan den mitkar tesendaktep mayutsü ajungshir: China

China yimtiba, Beijing nung tentetba Foreign Affairs Ministry kilung nung senden ka amenba jakdang Australia Foreign Minister, Julie Bishop (Abelen)-i China Foreign Minister, Wang Yi den teka amtepa ajuruba noksa nung angur. (Beijing, February 17)

Beijing, February 17 (Agencies): Australia-i Japan linük den mitkar tesendaktep mayutsü tajungshiba olen ka China-i tanü, Bodbar nü metetdaktsüogo.

Tang China semdanga alila, Australia Foreign Minister, Julie Bishop den Beijing yimti nung senden ka amendang China Foreign Minister, Wang Yi-i iba tajungshiba olenji metetdaktsü.

Australia-i dollar sen billion 29 shi jenjang aketba tzüyim telung nung senzüba submarine rong ishika Japan linük nungi alizüktsü sentong renemba osang angazükba sülen Yi-i Japan den mitkar tesendaktep mayutsü tajungshiba olenji lemsatep.

“Australia-i Japan den mitkar tesendaktep junga yangluba jakdang par linüki World War II tongpang nung kechi tashi shilem agi iba indang bilemdaktsünür. Ano, Australia linüki tanüngba Asia linüktem atema bilemtsütsü ajungshir,” ta Wang-i metetdaktsü.

“Japan-i par linük temzüng nung latetba ama inyaka, yimjung nung terenlok alitsüsa Australia-i par linük den yariteptsü ayongzüker,” ta pai shisem.

Australia-i Japan nung yangluba seret ton 4,000 taret Soryu submarine yanglutsü tasa alizüka kasaji par Australia nung yanglutsü alizüng yua lir.

Germany o France linük natia iba submarine yanglutsü tasaji Japan nungi alizüktsü merangba osang angazükogo.

Ano, China linük tashi kanga itshitsü tenzükba ngua par linük den tokteptsü nükjidong nung US sorkaria Japan aser Australia na tsüngda tesendaktep tajungba küma yanglutsü ajungshitsü tenzüka lir.

East China Sea aser Japan-i World War II mapang tashiyim inyakba den sentakba ken o nung ajemdaker China aser Japan linük na tsüngda tang tensa mejungi lir.

China den rongsenren tesendaktep tajungba küma yanglushitsü nükjidong nung Bishop-i Japan semdangba sülen China yashi, Mongolbar nü tonga ao.

“Ozü linük alizüng peridaktsü nung dang ozü Australia-i Japan nungi submarine rongji alizüktsü renema lir. Ano, ozü Australia-i tesüiba mapang atalokba indang mezüngshitsü saka tejakleni mera agitsü tenzüka lir,” ta Bishop-ia tanü metetdaktsüogo.