Australia-i mezüng test asaya nung runs 333 agi India akok

Pune, February 25 (Agencies) : Honibarnü Pune nung Australia team nungi left-arm spinner Steve O’Keefe-i kecha meimlai ka India nunger wicket 12 tashi agia tang tasayadak test mezüngbuba asaya anogo asemnü buba nung par teloki runs 333 agi kanga junga takok angu.
Par captain Steve Smith-i kanga junga asayaa Australia-i runs 441 yangluteta yutsü. Saka India-i over 33.5 nung runs 107 ang yanglutet. Ibaji ajanga Australia aser India na tsüngda test pezüben asayatsü aliba nung tang Australia-i 1-0 agi India koka lir.
India-i test asaya 19 tashi maneni koka arur tan tamakok angu. 2012 küm Kolkata nung England den tamakok anguba sülen tan mezüng tamakok angur.
Arishi küm 32 tain, O’Keefe-i inning anaprong nung 6/35 agütsü aser India-i inning anaprong nung runs 110-a metongtet.
World No.1 Test team atema ibai tamakok ulura liasü. Parnoki tanü batting, bowling aser fielding ajak kanga mejungi litet.
Captain Virat Kohli-i test asaya aruba nung tan tamajungba asayatet. Pai mezüng inning nung run meyalutet aser tanabuba inning nung runs 13 ang yanglutet. India-i pei linük nung asaya dang runs tajemtiba yangluba rongnung tan ya ka lir.
Mezüng test asaya nung India nunger batsman aikati runs 10 junga meyanglutet. Cheteshwar Pujara-i ang runs 31 yangluteta pai tajungba bat asü.
Iba asaya nung Australia captain Smith-i runs 109 yanglu.
Australia nunger spin bowler temi India nunger spin bowler Ravichandran Ashwin (7/182), Ravindra Jadeja (5/139) aser Jayant Yadav (2/101) nunger dang khenyongi tajungba bowl asü.