Australia-i Muslim refugee dang nungibo Khristantem tesapuba

Sydney, May 5 (Agencies): Australia-i Muslim refugee tem dang nungi Khristan refugee tem dak temulung tagütsüba, ta Australia nung Freedom of information law ajanga metetdaktsü.
July 1, 2015 nungi January 6, 2017 tsüngda Australia-i refugee 18,563 shi aniokogo aser parnok rongnung Khristantem noklang nung shilem 78 shi lir, ta Christian Today ajanga metetdaktsü.
Australia sorkari Khristantem dak temulung tali agüja mapa inyaker ta odia shiogo aser parnoki ashiba agi, reshikangshiba tiaji Khristantem teimba ajurur.
“Syria aser Iraq nungi arurtem aniokba nung tamangba yimsü dak rangloker mapa inyaker ta Australia sorkari shiogo. Kechiyong, linük ana nungji Islamic State aser tanga teloktemi Khristantem talila reshikangshir” ta Christian Today-isa metetdaktsü.
President Donald Trump-i anir U.S. aser U.K nung yimten lennirtemi iba tangatetba pusema nungiter saka tangartemibo Khristantemi reshikangshi talila ajurur ta asübaji magizüker.
Human Rights Watch nungi Elaine Pearson-i ashiba agi, “Syria aser Iraq nung tangar dang nungi Khristantem tali reshikangshir ta asübaji tai, ISIS aser Assa’er sorkari Muslim nungertema kanga reshikangshir.”