Australia: Kiefel 1 buba tetsür Chief Justice akümer

Canberra, November 29 (Agencies): Australia’er High Court Justice, Susan Kiefel-i Australia ajunga nung obendanger rong nung tematiba menden abentsü temeten yashi, Hombar nü ngüogo.
Tang Chief Justice menden abensang, Robert French-i obendangtsü menden taruba 2017 küm January ita toktsüba sülen arishi küm 62 tain Kiefel High Court Chief Justice menden abener mezüngbuba Australia tsür akümtsü.
1903 küm nungi tenzüka, okadak tentetba sülen Kiefel ya Australia’er 13 buba Chief Justice akümsü lir.
“Kiefel ya tangar ajungmesor ka aser tekübokba jenjang nung alir kati mamangtettsüsa temaba jenjang ajangzüker obendanger ka lir,” ta Kiefel Chief Justice tasenba shimba osang sangoktsüdang, Australia Ato Kilonser, Malcolm Turnbull-i metetdaktsü.
Kiefel-i la arishi küm 15 tain alidang technical college ka nungi secretary mapa shizüktsü nükjidong nung Brisbane nung tentetba school toktsü aser iba mapang nungi tenzüka, lai mapa tanga inyaka, high school züngtem aser tesülen aonung lapokba kaketreju nung law azüng.
“Ni school nung azüngtsü mejangrai aru aser school tembanga azüngba ajanga tajangzük anguba indang mangateti ali. School toktsür secretary mapa shizükba ajanga kü taküm jenjang tajungba akümtsü ta ni aibelena bilem. Lanurtemi ni ama telemtetba aibelena magitsü ajungshir kechiyong anündang mapa inyaka, aonung lesson angazüka bushitsü aser küm 5 nung anogo 5 nüa sodi mongui alitsüji jangratemtsübo masü,” ta Kiefel-i metetdaktsü.
Keifel-i Britain kübok University of Cambridge nung Master of Law degree agiba sülen la lar Australia linüki meyipa ao aser la Queensland state nung tentetba Supreme Court nung mezüngbuba tetsür obendanger 1993 küm aküm.
Kiefel ya High Court menden abener tetsür 3 rong nung 1 lir aser French sülenbo la ya Australia ajunga nung obendangtsü menden mapang talangtiba abener obendanger lir.