Australia linüki Kangaroo 2,000 tepsettsü

Melbourne, May 15 (Agencies):  Australia ya Kangaroo jenti aliba linük lir, ajisüaka iba shiruru jenti arenba ajanga iba continent timtem ajurur.
Osang ka ajanga ashiba agi, asüng nungi tenzüka Australia linüki Kangaroos 1900 dak tema tepsettsü, kechiyong iba shiruru tali arenba ajanga environment nung timtem adokdaktsür.
Australian Capital Territory (ACT) tesem ajaklen kangaroo tepsettsü. Kangaroo 1991 tepsettsü atema nikongdang shia territory shibangtsü, ta ABC osang ajanga ashi.
Parks & Conservation Director den ACT sorkar ketdangser, Daniel Iglesias-i, ACT nung  eastern grey kangaroo nütsüng azüoktsüji nüngdak, ta ashi.
“Eastern grey kangaroos tali arenba ajanga local environment nung timtem adoktsü ta onoki jangjaogo,” ta pai ashi.
“Iba ya ajanga de-vegetation akümtsü aser odang toktsüra tesem kar mejungi akümtsü ta onoki metet. Iba ya samatsütsü atema masü, iba ya eastern grey kangaroos shitak ayutsü atema lir,” ta Iglesias-isa ashi.
Kangaroo züinba azüoktsü atema fertility drugs amshitsü asoshi tang tetendangdak lir.
Asüng nungi tenzüka iba shiruru tepsettsü aser August 1 nü tembangtsüa akok.
Tesüiba küm ana tsüngda kangaroos 4,000 jungnüa tepsetogo.