Australia nung A-League masayai atatsü telemtetba agi

Melbourne, Metsüremi/March 24 (Agencies): Coronavirus tashidak pokteter aliba ajanga Australia nung A-League masayai atatsü asoshi Mongolbarnü telemtetba agiogo. Ketdangsertemi ashiba agi, tashidak prokshia meyoktsü asoshi senzüsenpong nung tenokdangba agütsür aliba ajanga linük nung top-flight soccer tetoktepba masayatettsüsa akümer.
Australia nung state timbaka nung tanga state nungi senzüsenpongertem marudaktsütsü asoshi tenokdangba agütsür aliba mapang ka nung Governing body Football Federation Australia (FFA)-i sangdong ka ajanga, board aser club tem ajaki mulungtepa Hombar aonung iba telemtetba agiogo, ta metetdaktsü.
“Yasüng agiba telemtetba agiba ya state aser national tenokdangba apir agiogo aser talisa New Zealand densema state tem nung senzüsenpongtsütsü tenokdangba agütsür aliba ajanga lir,” ta FFA tekolakba James Johnson-i Mongolbarnü Sydney nung osangbenertem dang ashi.
May ita asayatsü aliba playoffs masaya tsüngda regular season asaya round trok tembanga asüyatsü nüngdaka liasü, ajisüaka A-League koba April 22 nü nungi tenzüktsü sentong yanglur liasü, iba asyamung ya kodang-ang tenzüktetjar mejangjai kümogo aser ketdangsertemi tashidak ajanga timtem adokdaktsür aliba asadangba sülen ang telemtetba ka agitsü.
Broadcast revenues nüngdaka FFA-i season maneni asayatsü merangdangogo aser New Zealand team, Wellington Phoenix dena parnok Australia nung amendaker asayatsü asoshi angatetteper liasü. Ajisüaka Australia ajunga nung tenokdangba agüja aoba ajanga FFA-i iba telemtetba agitsüsa aküm.
“Linük ajunga tetoktepba ka ama iba tetoktepba ya Australia ajunga aser New Zealand nunga asaya aser tang iba sentong ya tebenja ka nungi tamakoktsü sentong ka kümogo,” ta Johnson-i ashi.
Australia nung tongtibang asayamungtem ajak thiogo. Australian Rules football, National Rugby League aser Super Rugby-ia anogo ishika tejakdang parnok asayamungtem thinenogo.
Tanga league den külemi Australian soccer-a senotsü tsütsü tetsükdaktsü ajurur, kechiyong A-League nung team 11 nongita yaritsü asoshi senotsü peria mazükteter aser iba den asayartem nem itasen agütsütsü densema lir.
A-League club tem timbaka küm aika takoksa nung inyaksangshia aruogo aser Johnson-i club ajaki iba tensa ajangtettsü ta meshiteter mesera Sydney nung amendaker aliba Macarthur FC pur 2020/21 season nung asayatettsü masayatetja meshiteter.
Tetsür aser tebur International fixtures-a iba tashidak agi kongshiogo aser iba ajanga rongsenketsüng nung FFA akoksaogo.
Johnson-i ashiba agi, iba asaya kümzüktettsü saka taruba anogotem nung tongtibang telemtetba tasak kar agitsü.