Australia nung India nungeri online ajanga visa apply sütettsü

Melbourne, June 19 (Agencies): July 1 nungi tenzüka India lisopur temi Australia-i aotsü asoshi ‘visitor visa’ ya online ajanga meshitettsü, ta Australia sorkari Hombarnü sangdong. Iba ajanga India nungeri Australia indang visa ngutettsü asoshi inyakyim tezübaba akümer.
“Online ajanga linük indang ‘visitor visa’ atema application agütsüba ajanga India nunger asoshi visa yanglutsü maparen kanga tezübaba akümtsü,” ta Australia nung Immigration & Border Protection indang Assistant Minister, Alex Hawke-i ashi.
Australia ya ‘holiday destination’ tajung asüba ajanga India nunger Australia indang visa aginür timba kümdagi, ta ketdangser ajangasa ashi.
2017 küm mezüng ita pezü nung Department of Immigration & Border Protection ajanga India nunger nem Australia indang ‘visitor visa’ 65,000 agüja lir.
“Online ajanga ‘visitor visa’ atema application agütsütetba ajanga India nungeri raliwalir, shishilembar ama mesüra kinunger aser medemertem den sendaktepa alitsü asoshi Australia semdangtsü tezübaba akümtsü,” ta Hawke-i ashi.
Iba sentong ya 24×7 angutsü, visa indang taa electronic payment ajanga agütsütettsü aser iba application ya online ajanga department indang ImmiAccount portal nung reprangtsü akoktsü.
“Iba application online ajanga reprangba kisüng masü saka visa renemba sülen mapang talangka meindoki India nunger tem senzüsempongtsü asoshi sentong takokba nung yanglutsütsü,” ta pai-sa shisem.