Australia nunger den yaritepa HSLC tatidang atema digital class renemer

Dimapur, March 1 (TYO): Australian educators-i Nagaland nung tesayurtem den education delivery model ka yangludar.

Iba mapatong ya NagaEd ajanga tenzük aser iba ajanga parnoki kaketshir nem quality education agütsütsü alizüng lir. Iba digital crash course ya class 10 kaketshirtemi HSLC tatidang agütsüba nung teyari angutsü atema lir. Iba course nung NBSE curriculum atema eLearning design agütsür aser NagaEd Digital School ajanga angutsü.

NagaEd Digital School nung kaketshirtemi notes, videos, interactive games & quizzes ajanga tajungba angazüker. Crash Course Program ya tan hopta school 5 nung tenzüktsü aser iba nung kaketshir 300 aser tesayur aika nem training agütsütsü.

“Australia educators aser Nagaland tesayurtem tsüngda yaritepa inyakba ya kaketshirtem dang tajungba sayutsü atema lir. Iba ajanga kaketshirtem, tesayurtem aser ketdangsürtemi maongka angur” ta NagaEd Founder, Kevisato Sanyü-i ashi.

RMIT University Australia nung Senior Learning Designer Tran Nguyen-i Nagaland nung tesayurtem den yaritepa digital courses renemer.

“NagaEd den külemi inyaksemba nung aika ajangshia arur aser tenük lapoktsüogo. Ni Australia nung alir asünung, Nagaland nung Learning and Teaching team den külemi mapa inyaka arudang tayongzükba aika ajurur saka kaketshirtem taginüba tongtsütsü atema onoki inyaker. NagaEd-i meta talang pilar alirtem asoshi course balala renemba ya kanga dang junga shisateta inyaker” ta Tran Nguyen-i ashi.

“Naga nungeri technological education wadang nung iba ama mapa tulu inyakba ajanga ni kanga ajungmesor. Parnoki inyakba mapa atema tenüngsang agütsür” ta Christian Higher Secondary School Vice Principal, Patricia Zhimomi-ia metetdaktsüogo.

“Onoki kaketshirtem nem offline aser online ajanga quality education agütsütsü atema delivery model ka renemer. Kaketshirtem ket nung oset maliba aser internet connectivity majungba ajanga timtemer aser iba tayongzükba koktettsü atema onoki inyaker. Iba delivery model indang taruba shilem renemtsü atema onoki school tem jaokogo. Tejangrartemi hello@nagaed.com mesüra website at www.nagaed.com ajanga onok den tongteprateptsü akok” ta Kevisato Sanyü-ia ashi.