Australia Open:Tsitsipas, nadal, Kvitova Slam Semi-final-i iogo

Aenjeti/January 22, 2019 (Agencies): Mongulbarnü Australia Open tebur kija asaya quarter final nung Greek nunger Stefanos Tsitsipas-i Spain nunger asayar Roberto Bautista Agut madak takok ngua semi-final tongtetogo.
Taoba asaya nung ajak aoksadakja Roger Federer akokba sülen tanü asaya nung pai 7-5, 4-6, 6-4, 7-6 (7/2) agi Bautista madak takok nguogo.
“Iba takok ta fairytale ka ama bilemer. Ni pungmanga aliba lima ka nung ni lidar aser ni meranga inyakba ajanga iba ya ajangzükogo,” ta Tsitsipas-i ashi.
“Kü dang taküm asoshi nü nükjidong kechi ta asüngdangba mapang ni Grand Slam nung semi tongtettsüba ta shia liasü. Ni iba ya ashiba mapang nung ni yamatar ta bilem, saka tang asangsang nung atalokogo,” ta paisa ashi.
Arishi küm 20 tain Greek nunger asayar ya Andy Roddick sülenbo Melbourne Park nung semi tongteter tanobusang kümogo aser Greece nungi Grand Slam ka nung semi tongteter mezüngbuba kümogo.
Kasa asayamung tebur kija asaya nung second seed Nadal-i America nunger asayar Frances Tiafoe 6-3, 6-4, 6-2 agi ayong ayonga koka semi final tongtetogo. Pai tang tashi nung set ka nungdanga tamakok ngua mali.
Tiafoe-i fifth seed Kevin Anderson kokogo saka pa asoshi Nadal kanga tashi tait liasü.
“Kü career tepeyong ni iba asayamung nung timtem ajurua aruogo, anungji taonung asaya yimya dak ni kanga temulung asür,” ta nadal-i ashi.
Pa semifinal nung Tsitsipas den asayatsü.
Czech tsür Kvitova shibai taoba asayamung tongtibang ti tashi nung khen danga last eight ajanga mali lai tetsür kija asaya quarter nung Ashleigh Barty 6-1, 6-4 agi koka semifinal tongtetogo.
“Ni idaki meyipa arua yamai junga asayatsü imlaa mali asü. Ni iba ya kü asoshi tanabuba career ama züngshir. Anungji tanabuba career asoshi tang ya mezüngbuba semifinal asütsü aser ni kanga jangradema asayadar,” ta Kvitova-i ashi.
Semifinal nung Kvitova America tsür Collins den Brehostibarnü asayatsü.
Iba asayamung nung shilem magi tsüngda Collins-i Grand Slam nung asaya ka danga koka mali, saka lai round pezübuba nung second seed Angelique Kerber tsükdaktsü.
Maneni Collins-i quarter-finals asaya nung Russia tsür Anastasia Pavlyuchenkova 2-6, 7-5, 6-1 agi kokogo
“Iba ya ni asoshi tajangshiba khenyongi balaka aser jangratemtsüka lir. Taoba küm iba mapang nung ni Newport Beach nung challenger (tournament) ka asayaa liasü. Ajisüaka ni iba asayamung nung jangratema asayar. Fan tem matsüngdang asayaba ajanga asaya temelaba kümdaktsür,” ta lai ashi.