Australia ruling party-i Scott Morrison ato kilonser shimogo

Canberra, Luroi/August 24 (Agencies): Rogonü Liberal party nung lennir asütsü asoshi nisung asem toktepba sülen Scott Morrison ya Australia ato kilonser inyaktsü shimtetogo.
Morrison-i taoba mapang cabinet minister inyaka alisang, Peter Dutton madak vote 45-40 agi takok angu.
Dutton busemertemi ato kilonser menden nungi alutsü alisang, Malcolm Turnbull dang lennir shimtsü asoshi takhangba agüja liasü. Iba tetoktepba nung Turnbull-i metoktep aser pai yimten yimsüsüba nungi anentsü bilema aliba indang lemsatep.
“Ni mapang talangka melie parliament toktsütsü,” ta pai osangbener dang ashi.
Kümsük küm asem tembanga meinyakdang pei party-i ato kilonser menden nungi amemtsür rongnung Turnbull ya pezübuba akümer aser iba yimya ya Australia nunger ajungai sempar.
Dutton busemertemi pa indang lennisüba atsüzüktsü meranga Sangtennü yimjak nung nübuyimba asoshi ato kilonseri aitsü.
“Tang inyaka aliba nung tamang makateti Australia nunger alitsü,” ta Turnbull-i ashi.
Foreign Minister Julie Bishop ya aikati sabua liasü aser Australia indang tetsür ato kilonser tanabuba akümtsü liasü. Saka la ya mezüng agiba vote nung magizük.
La-ia yimten yimsüsüba nungi anentsü akok, ta Australian media ajanga ashir.
Monupii/May 2019 nung election agitsü lia conservative sorkar nung tarak ketdakja toktepba sülen Morrison ya Australia indang ato kilonser 30buba akümer.
Tekeratiba nung election agitsü südi, ta olulu adoka aliba anenja Rogonü pai jembiba mapang, linük anüdoklen tzüngsarusa tebilemtsü mezüng reprangtsü ta metetdaktsü.
“Tangsa tangbo shingaia election atema sentong meyanglui alitsü ya ni bilemer,” ta pai ashi.
Küm ter majungdang Morrison ya Australia ato kilonser trokbuba akümer.
Yimsüsür telungzük nung mapang shia mangatettep adokba ajanga Australia nungertem laktetogo, ta Sydney Morning Herald nung political editor, Peter Hartcher-i ashi.
Rogonü Parliament House nung senden amenba mapang Turnbull-i ato kilonser tasenba shimtsü temelaba magütsüdang Liberal party nung legislator shirnokisa pa menden nungi aludaktsünür, item tenüngtemji agüjang, ta akhang. Aser par sorkar nungi pa senzüka yutsürtem tenüng ya timba liasü.
Senden tenzüktsü mapang tatsüka lia nisung 43 indang meyongnem (signature) agütsü. Aser item rongnung Turnbull busemer aika liasü.
Dutton aser Turnbull camp temi Australia nunger yimten yimsüsüba nung mangatettep adokdaktsüba ama kodanga mongudang. Telok ana tsüngta mangatettep adokba ajanga Yangtepnü Parliament magitettsüsa aküm aser Liberal party indang tenüng menüktsü.
Nüburtem tejashi ya aonung ka tsüngta jangja jangja ajiteta Brisbane nung Dutton indang office window tem raksatsü.
Turnbull-i Rongjui/September 2015 nung mezüng ato kilonser menden ngutet. Takataiter Turnbull-i 2016 general election nung vote tera agidang koka liasü.
Liberal party nung lennir atema vote agitepba sülen party züngsem, Warren Entsch-i, ato kilonser kishi melentepa alongba ya anentsüla, ta ashi.
Yimten yimsüsüba nung tashi maitba ajanga Australia nunger ajunga temulung yirutsür, ta Ernest & Young indang chief executive officer, Tony Johnson-i ashi.
“Taoba küm ter tsüngta yimten yomsüsüba nung mangatettep aliba ajanga linük balala den toktepba nunga takoksa agütsür… Investment ajungkettsü aser shishilembaba nung temulung lemtettsüsa shishilembartemi teimla aliba sentong aginür,” ta Johnson-i ashi.