Australia teloki Sultan Azlan Shah Cup takok marok agizükogo

Ipoh, April 16 (Agencies): Australia teloki goal 4-0 agi India telok final asaya koka 25 buba Sultan Azlan Shah Cup hockey asayamong takok marok tanü, Honibar nü agizükogo.
Thomas William Craig aser Matt Ghodes naprongi goal 2 agüja par Australia telok nem tanü takokbaji ngudaktsü.
World Champion aser World No.1, Australia teloki tan asayamong nung asaya ajunga takok ngua, takok marokji agizüker lir.
Tanü asaya tenzüker minute 25 buba nung Craig-i par telok asoshi mezüngbuba goal agütsüba sülen maneni minute 35 buba nung goal 1 agüja par Australia telok goal 2 agi India den temaba jenjang kümdaktsü.
Tanü goal agütsübaji Craig-i tan asayamong nung goal 4 buba agütsür liasü.
Tesülen, Ghodes-i minute 43 aser 57 buba na nung goal 2 agüja par Australia telok nem takok ngudaktsü.
India teloki tan agi Sultan Cup takok marok 6 ben buba agizüktsü alizüng yua liasü saka par teloki tanü tamakok ajuruba yong iba alizüngji majangzüktettsüsa küma, tan asayamong nung silver medal ang agizüktsü jenjang angur lir.
Ano külen, tan takok marok agizükba ya Australia teloki Sultan Cup takok marok 9 buba agizüker lir.