Australia tetsür team-i wicket 7 agi India A tetsür team kokogo

Mumbai, Metsüremi 08 (Agencies): Yangtepnü (Thursday) Mumbai nung tanabuba warm-up asaya nung Australia tetsür team-i India A team madak wicket 7 agi takok ngutetogo.
Sangtennü (Tuesday) mezüngbuba warm-up asaya nung Australia tetsür team-i India tetsür team madak run 321 agi koktetta lir, aser maneni tanabuba warm-up asaya nunga parnoki takok nguogo.
Iba asaya nung India team-i mezüng batting asütsü asoshi shimtet sülen parnoki run 170 dang yanglur ajak out süadok. Asaya nung Australia team-i bowling kanga junga ona India team nem run aika meyangludaktsü.
Australia team nungi Jade Wellington-i run 30 agütsür wicket 3 agi aser Ashleigh Gardner-ia run 32agütsür wicket 2 agi.
Mumbai Cricket Association Bandra Kurla complex facility nung asaya mapang, India nungi captain Anuja patil-i run 49 yanglutet.
Tanabuba innings asaya nung Australia team-i kanga dang ayonga over 26 nung asaya koktet. Captain Meg Lanning-i run 63 yanglu aser la den yarisema Ellyse Perry-ia run 38 yanglu. Iba asaya tatem kati marudang tenaprongla out sütsü. Iba sülen Alyssa Healy-i run 31 yanglua liasü.
Vadodara nung Metsüremi (March) 12 nungi tenzüka Australia tetsür team aser India tetsür team na tsüngda ODI asaya asem tashi asayatsü.