Australian Open 2017: Serena aser Venus William Final asayatsü, Federer Final tongogo

Melbourne, January 26 (Agencies): US tsür tennis asayar mongin, Serena Williams-i Grand Slam takok 23 buba angutsü asoshi asaya ka tang anünga lir, aser iba asaya ya teyi Venus Williams den asayatsü lir.
Tanü Serena aser Croatia tsür Mirjana Lucic-Baroni tsüngda Semi-final asayaba nung Serena-i minute 50 nung Croatia tsürla madak 6-1, 6-1 agi takok angu.
Arishi küm 35 tain, Serena Williams-i tang asayaba Australian Open ya akok nungbo, Steffi Graf-i yanglua aliba otsü yanglushitsütsü. Graf-i Grand Slam takok 22 ngua lir. Aser iba asayamung ya Serena-i akok nungbo, la World No 1 akümtsü.
Venus Williams aser külem lisopur, Coco Vandeweghe tsüngda semi-final asayaba nung, Venus-i 6-7(3/7), 6-2, 6-3 agi Coco madak takok angu.
Serena aser Venus tsüngda Grand Slam final 8 ben asayaogo aser item asayaba nung tanutsüla, Serena-i trok ben aser tantsüla Venus-i anaben koka lir. Tena tesüsa final asayar küm ti süiogo.
2017 Australian Open, teburtem mezüngbuba semi-final asayaba nung Federer-i par küsa lisopur Wawrinka madak 7-5, 6-3, 1-6, 4-6, 6-3 agi takok ngua final tongogo.
Arishi küm 35 tain, Federer-i iba semi-final nung takok anguba ajanga, otsü tasen ka yanglur. Tennis asayaba otsü taoba küm 40 tsüngda nung Federer ya Grand Slam final asayar rongnung tambutiba akümer.
Asüng Rafael Nadal (Spain) aser Grigor Dimitrov (Bulgaria) tsüngda tanabuba semi-final asayaba nung takok angusang den Roger Federer Final asayatsü.