Australian Open: Djokovic o Nadal na final asayatsü

Melbourne, Aenjeti/January 25 (Agencies): Tang tesayidak aliba Australian Open tennis asaya tebur kija Hokolbarnü semifinal nung Serbia nunger Novak Djokovic-i France nunger Lucas Pouille madak 6-0, 6-2, 6-2 agi takok ngua iba asayamung final tenetbenbuba tongogo.
Australian Open trokben tashi takok angusang Djokovic iba asaya nung ghonda 1 sür minute 23 nung Pouille tsükdakja pai Melbourne Park nung semi-final record 7-0 yanglua liasü.
“Iba court nung asaya aruba rongnung tan asayamung ya kü atema tajungtiba lir. Asaya metenzükdang ni bilemba ama maparen ajak takok ngua liasü,” ta Top seed nung alisang Djokovic-i ashi.
Aenjeti 27, 2019 Deobarnü seed tanabuba nung alisang Spain nunger Nadal aser Djokovic na tsüngda final asyatsü. 2012 küm kasa asayamung final nung Djokovic-i ghonda 5 ser minute 53 nung Nadal madak takok ngua liasü koba Grand Slam final asaya rongnung mapang talangtiba asütsü.
“Final asaya reprangtsü atema shirnoki ano ticket alia mali parnok asoshi ni ticket alitsüner,” ta asaya koker court nung Djokovic-i ashi.
“2012 asayamung final nung takok angubaji taküm nung asyamung tongtibang ka liasü aser taküm-a ni kasa sempet amshia asayatsü imlar,” ta Djokovic-isa ashi.
Hokolbarnü semi-final asaya metenzük tsüngda Djokovic-i asayamung akoktsü ta nüburtemi jembia liasü.
Taoba Grand Slam asaya 27 tashi nung France nunger asayar kati danga Djokovic koka mali. 2010 küm kasa asayamung quarter-finals nung Jo-Wilfried Tsonga-i Djokovic tsükdakja liasü.
Kasa asayamung tetsür tarep temeyoktep final nung China tsür Zhang Shuai aser Australia tsür Samantha Stosur nati taoba küm asayamung takok angur France tsür Kristina Mladenovic o Hungary tsür Timea Babos madak 6-3, 6-4 agi koktetta tenati mezüng Grand Slam jenjang ngutetogo.
“Tanü ya kü atema nükjidong atalokba anogo lir,” ta mezüng tetsur tarep Grand Slam angula Zhang-i ashi.
“Shuai, iba asaya nung teti nü den külemi shilem agiba ya jangratemtsüka, ana tsüngda tesendaktep tajung aliba asoshi ni pelar,” ta Stosur-i shisem.
Zhang o Stosur na longjema asaya aruba nung tan agi mezüngbuba Grand Slam jenjang ngua lir. Iba dak alaka, 2005 US Open aser 2006 French Open asayamung ana tashi nung Stosur aser America tsür nati 20 ben tashi takok ngua lir.
Anogo ishika tejakdang, final tongtettsü atema, Stosur aser Zhang nati taoba French Open aser Wimbledon asayamung takok angur Czech tsür tarep Barbora Krejcikova aser Katerina Siniakova na 7-6, 7-6 agi tsükdakja liasü.