Australian Open: Djokovic pezübuba round tongtetogo

Melbourne Aenjeti 20 (Agencies): Küptoknü (Saturday) Australian Open tebur tennis asayaba mapang Novak Djokovic teperem nung timtem ajangshia liasü, saka iba tekangshi liaka pai iba asayamung nung 16 ben buba shilem agiba mapang 11buba takok ngütetogo.
Australian Open 6 ben takok ngua alisang, Djokovic-i Küptoknü Margaret Court Arena nung asayaba mapang 6-2, 6-3, 6-3 agi Spain nunger 21buba jenjang nung alisang, Albert Ramos-Vinolas madak takok angu.
Saka tanabuba set asaya tenzüker mapang tatsüka dang lirbo Serbia nunger Djokovic teperem nung timtem ajurüba ajanga, asaya khen tatsüka atema anena anepalua liasü.
Achichi tekatsüla (elbow) nung timtem aliba ajanga ita trok masayateti arur Djokovic-i tang Australian Open taruba asaya Amungnü South Korea nunger Chung Hyeon den pezübuba round asayatsü. Chung-i Alexander Zverev madak takok ngua lir.
“Iba asaya straight sets agi koktet saka ghonda ana sür tesadang jungnüa asaya, anungji court nung iba asaya ya kangarabo temela aser ayonga meliasü,” ta Djokovic-i ashi.
Kasa anogo Switzerland nunger tennis asayar mongin, Roger Federer-i Richard Gasquet madak 6-2, 7-5, 6-4 agi takok ngua 20buba grand slam title abentsü asoshi anasai ogo.
Arishi küm 36 tain aser Australian Open defending champion, Federer-i Rod Lavers Arena nung round pezübubai aitsü asoshi ghonda ana tera majung asaya.
Federer ya quarter-finals-i aitsü atema Hungary nunger Marton Fucsovics den asayatsü.
Kasa anogo Australian Open tetsürtem kija asaya nung Maria Sharapova indang tiemla samaja Angelique Kerber-i 6-1, 6-3 agi Küptoknü tsükdaktsü.
Russia tsür Sharapova ya 2016 küm kasa asayamung nung nokdanga aliba mozü amshiba puteta ita 15 tashi asaya nung shilem magidaktsü lir arua round ana tashi kanga junga asaya liasü.
Saka Germany tsür, Kerber-i kanga mela takok ngutet.
Australian Open 2018 teburtem tarep asaya nung Leander Paes aser Purav Raja na round of 16 tongtetogo.
India nunger tebur tennis tarep asayar Paes aser Raja nati World No. 5, Jamie Murray aser Bruno Soares na madak Keptoknü anepdang asayaba mapang tsükdaktsü.
Paes aser Raja nati ghonda ana ser minute 54 asayaba mapang Jamie aser Bruno na madak 7-6 (3), 5-7, 7-6 (6) agi akok.
Arishi küm 44 tain Paes aser Raja nati taruba asaya Colombia nunger Juan Sebastain Cabal aser Robert Farah na den asayatsü.