Australian Open: Federer Grand Slam singles asaya 300 akoker akümer

Melbourne, January 22 (Agencies): Switzerland nunger tennis asayar mongin, Roger Federer-i Bulgaria nunger Grigor Dimitrov tasembuba asaya nung tsükdaktsüba sülen tang tasayadak Australian Open asayamong tebur singles shilem indang 4 buba round asayatsü jenjang tanü Hokolbar nü nguogo.
Taoba mapang Grand Slam takok marok 17 tashi agizüksang, Federer-i tanü points 6-4, 3-6, 6-1, 6-4 ngua Dimitrov madak takok angu.
Tanü asayaji akokba sülen arishi küm 34 tain Federer Grand Slam asaya 300 buba akoker asayar küma otsü tasen yanglur lir.
Tan takok anguba sülen tesüiba World No. 1, America nunger Jimmy Conners den asaya 67 agi timba akoker akümsang, Federer-i tanü otsü tasen yangluba sülen maneni Grand Slam takok marok 18 buba agizüker asayar akümtsü alizüng tulu yua lir.
Russia tsür, Maria Sharapova-ia tanü points 6-1, 6-7 (5), 6-1 ngua America tsür, Lauren Davis tsükdaktsüba sülen tetsür singles shilem indang 4 buba round asayatsü jenjang ajangzükogo.
2008 Australian Open champion, Sharapova-i tanü takok anguba sülen tour shilem nung asaya 600 akoker asayar kümogo.
Tan asayamong nung 5 buba jenjang abenla, Sharapova-i World No. 12, Switzerland tsür, Belinda Bencic den 4 buba round nung ajuruteptsü.
Defending champions, Novak Djokovic aser Serena Williams natia tanü takok ngua 4 buba round asayatsü jenjang nguogo.
Serbia nunger Djokovic-i tanü points 6-1, 7-5, 7-6 (8/6) ngua Italy nunger Andreas Seppi 3 buba round nung tsükdaktsü.
America tsür, Serena-ia tanü minute 44 nung points 6-1, 6-1 ngua Russia tsür, Daria Kasatkina madak 3 buba round asaya akok.