Australian Open: Kerber-i tetsür singles takok marok agizükogo

2016 Australian Open tetsür singles takok marok angula, Germany tsür, Angelique Kerber (Achiji) aser tanabuba jenjang angula, America tsür, Serena Williams nati takok marok amer pelatepba noksa nung angur. (Melbourne, January 30)

Melbourne, January 30 (Agencies): Germany tsür, Angelique Kerber-i America tsür, Serena Williams final asaya nung tsükdakja 2016 Australian Open tetsür singles shilem indang takok marok tanü, Honibar nü agizükogo.
Tan asayamong nung 7 buba jenjang abenla, Kerber-i tanü points 6-4, 3-6, 6-4 ngua tetsür World No. 1, Serena final asaya nung tsükdaktsü.
“Ni taküm piyong kanga meranga terenemshiba agiba sülen tanübo ni Grand Slam takok marok agizüker asayar ka kümogo,” ta tan mezüngsüa Grand Slam takok marok agizükla, arishi küm 28 tain Kerber-i metetdaktsü.
Taoba mapang shilem agiba Australian Open tetsür final asaya 6 prongla akokla, Serena-i tan tamakok anguba ajanga lai Steffi Graf-i taoba mapang Grand Slam takok marok 22 tashi akokba otsü memeneptettsüa kümogo.
Ano külen, tan asayamong nung 7 buba jenjang abener, Britain nunger Jamie Murray aser Brazil nunger Bruno Soares natia final asaya nung takok ngua tebur doubles shilem indang takok marok tanü agizükogo.
Jamie o Bruno nati tanü points 2-6, 6-4, 7-5 ngua Czech Republic nunger Radek Stepanek aser Canada nunger Daniel Nestor na tebur doubles final asaya nung tsükdaktsü.
Jamie ya Serbia nunger Novak Djokovic den tebur singles final asayatsü jenjang ngua alisang, Andy Murray teti lir.