Australian Open: Rafael Nadal mamangtsüka tsükogo

Melbourne, January 19 (Agencies): Spain nunger tennis asayar mongin, Rafael Nadal-i mezüngbuba round asaya nung tamakok ngua tang tasayadak Australian Open tennis asayamong nung joko shilem magitettsüsa jenjang tamajung tanü Mongolbar nü ajuruogo.
Külem sensopur, Fernando Verdasco-i ghonda 4 ser minute 41 nung points 7-6 (8/6), 4-6, 3-6, 7-6 (7/4), 6-2 ngua Nadal tanü tsükdaktsü.
Tanü tamakok ajurubaji Nadal-i tongti Grand Slam asayamong nung tamakok tulutiba ajurur lir.
Taoba mapang Grand Slam takok marok 14 tashi agizüksang, Nadal-i Wimbledon 2013 nung tamakok ajuruba densema tan agi Grand Slam asayamong mezüngbuba round asaya nung tanabenbuba tamakok ajurur lir.
“Tanü ya kü anogo masü. Tanü tamakok ngua aka, ni taoba ita 5 shi agiba ama maneni tennis asayatsü terenemshiba agitsü,” ta arishi küm 29 tain Nadal-i tesülen metetdaktsü.
Tetsür World No. 2, Simona Halep-a China tsür Zhang Shuai-i tanü tetsür singles shilem indang mezüngbuba round asaya nung tsükdaktsüba osang jangjaogo.
Romania tsürla, Halep den jenjang 131 agi tekübokba, World No. 133 jenjang abenla, Shuai-i tanü points 6-4 6-3 ngua Halep ayong ayonga akok.
Tanü Halep madak takok angubaji Shuai-i 15 ben tashi merangba sülen tan mezüngsüa Grand Slam asaya akoker lir.
Ano külen, Britain nunger Andy Murray-ia points 6-1, 6-2, 6-3 agi Germany nunger Alexander Zverev tsükdakja tanabuba round-i iogo.
Tetsür World No. 3, Spain tsür, Garbine Muguruza-ia ghonda ka shitak nung points 6-0, 6-4 ngua Estonia tsür, Anett Kontaveit madak takok ngua tetsür singles shilem indang tanabuba round asayatsü jenjang ajangzükba osang jangjaogo.