Australian Open: Saina -i 2 buba round asayatsü

Sydney, June 08 (Agencies): India’er tetsür badminton asayar mongin, Saina Nehwal-i takok ngua tang tasaydak Australian Open Super Series badminton asayamong tetsür singles 2 buba round asayatsü jenjang tanü, Bodbar nü ajangzükogo.
2014 küm Australian Open takok marok agizükla, Saina-i tanü minute 29 nung points 21-10 21-14 ngua, Australia tsür, Joy Lai tsükdaktsü.
Tan asayamong nung 7 buba jenjang abenla, Saina-i Malaysia tsür, Jin Wei Goh den 2 buba round asayatsü lemzükogo.
Ajisüaka, külem sensotsür, PV Sindhu-i par tetenzükba round asaya nung tamakok ngua, tan asayamong nung joko shilem magitettsüsa jenjang tamajung ajuruogo.
Tetsür World No. 40, South Korea tsür, Kim Hyo Min-i tanü minute 55 nung points 21-15 21-19 ngua, World No. 10 Sindhu tsükdaktsü.
Sindhu-i tamakok nguaka, Tanvi Lad-i tanü minute 52 nung points 18-21 21-14 21-11 ngua, Australia tsür, Tiffany Ho tsükdakja 2 buba round-i aiba osang jangjaogo.
Ano külen, Kidambi Srikanth-i points  21-16 21-12  agi Hong Kong nunger NG Ka Long Angus aser Sameer Verma-i points 22-20 15-21 21-15 agi Indonesia nunger Ihsan Maulana Mustofa madak takok ngua, tebur singles 2 buba round asayatsü jenjang ngua liasü.
Srikanth-i Indonesia nunger Sony Dwi Kuncoro den aser Sameer-i Anthony Sinisuka Ginting aser Chou Tien-chen na rong nung takok angur den 2 buba round asayatsü.