Australian Open: Simona Halep-i kokogo: Djokovic tsükogo

Melbourne, Aenjeti 22 (Agencies): Tentonü Australian Open tetsür quarter-finals asaya nung World No. 1 Simona Halep-i Japan tsür, Naomi Osaka madak 6-3, 6-2 agi takok nguogo. Tena tsüngda asaya minute 81 asaya-a liasü.
“Ni iba asayamung nung tanaben quarter-finals tongtetba atema kanga pelar,” Romania tsür Halep-i ashi.
“Kü atema iba asayamung ya kanga talangka ama bilema liasü,” ta Halep-isa ashi. Asayamung tenzükli nungi tang tashi nung lai asaya balala asayaba ajak agi ghonda 9 jungna asayaogo, koba asayar shingaia asaya-a mali.
Mezüngbuba set game pungobuba nung Japan tsür Osaka-i Halep indang serve break asütsütsü asoshi maongka ngua liasü, saka lai break mesütet. Osaka tezü atangba maongka agia tanabuba game nung Halep-i la indang serve break süa liasü.
Iba asaya mezüngbuba set minute 42buba nung Halep-i akok.
Maneni Australian Open semi-finals nung World No.1 Simona Halep jenjang 6buba nung alila Czech Republic tsür Karolina Pliskova den mesüra jenjang 20buba nung alila Barbora Strycova den asayatsü.
Kasa asayamung tebur kija asaya nung South Korea nunger Ching Hyeon-i kanga meranga asayar, Serbia nunger asayar Novak Djokoivc madak 7-6(4), 7-5, 7-6(3) agi takok nguogo. Djokovic-i tang tashi nung Australian Open Asayamung trok ben tashi koka lir, saka taküm asaya nung pa round pezübuba nung tsükogo.
Arishi küm 21 tain Chung ya jenjang 58buba nung lir aser pai taoba World No.1 Djokovic den kanga dang junga asayaa pa iba asayamung nung maneni tejakleni tudar.
Djokovic takatsü nung timtem aliba asaya peyong reprangtetogo aser pai mezüngbuba game pongu tashi mekoki aliba nung menepa atur Chung-i mezüngbuba set tiebreak ajanga ang akok.
Tanabuba set asaya nunga Chung-i kanga dang kara 4-1 agi tejakdang sür asayaa tenzük. Temang nung timtem liaka Djokovic-ia meranga asayar 5-6 tongteter lia pa anosa tashi meiti kümadok aser set point asaya nung Djokovic-i ball net nung züklokja asaya makok.
Maneni Djokovic-i tasembuba set nunga tiebreak asayatsüsa asayatet saka Chung-i iba asaya akoktsü temulungtetba nung kanga meranga asayaa arishi küm 30 tain Serbia nunger asayar madak takok angu.
Semi-finals nung jenjang ka atema Chung America nunger asayar Tennys Sandgren den asayatsü.