Austria-i Tir election October 2 nü agishitsü

Vienna, July 05 (Agencies):  Taküm May ita agiba Tir election magizüktsü o bendang ka okadaki agütsüba sülen Austria nüburtemi par Tir tasenba shimtsü election taküm October ita tanaben agishitsü renemba osang ka Austria sorkari tanü, Mongolbar nü metetdaktsüogo.
Tan Tir election tanaben agishitsü renemba ajanga opposition Freedom Party (FPOe) yimtenren telok nungi Tir candidate, arishi küm 45 tain Norbert Hofer-i election nung takok ngua Austria Tir akümtsü asoshi tanaben tokteptsü maongka angur lir.
Taküm May ita agiba Tir election nung Independent telok nungi candidate, arishi küm 72 tain Alexander Van der Bellen-i Hofer den vote 31,000 agi timba ngua Tir tasenba akümtsü jenjang angu.
Ajisüaka, FPOe teloki taoba June ita 8 nü benokba election nung ochimashi inyakba onük agizüka, Austria nung tentetba tematiba okadak, Constitutional Court-i Tir election-ji magizüktsü lemteta, Tir election tanaben agishitsü obendang tan July ita 1 nü agüja liasü.

You must be logged in to post a comment Login