Austria nung Tir election agishir

Vienna, December 4 (Agencies) : Austria nunger tang ya Tir election agishiba mapa ka lir aser iba election nung far-right Freedom Party nungi candidate Norbert Hofer aser tesüiba mapang Green Party nung tekolakba Alexander Van der Bellen na tokteper.
May ita agiba election nung Van der Bellen-i vote tera agi tang takok angu, ajisüaka vote azüngba mapang timtem kar adokba ajanga iba election ji Austria nung okadak tulubai magizük.
Hofer-i takok angu nungbo pa ya EU anemer mezüngbuba far-right party nungi linük lenir akümtsü.
November ita tebilemba asandangtsü vote sütepba mapang tena vote kanga anasatep asüba ajanga takok aser tamakok osang ashitsü saksaker ta metetdaktsü.
Tan iba election nung vote asüba ajunga kanga junga mita atadar.
France, Netherlands aser Germany linük tem nunga sangküm election agitsü aser iba election nung tang yongi anti-mainstream aser anti-immigration tem jenjang tajungba lir.
Austria-i EU koleni anir ibajia kanga junga repranga atadar.
Hofer-i anti-immigration sabang ka nung pa nüboyim sentong agiogo aser iba mapang pai, Austria-a Britain sülen anidaka EU toktsütsü, ta shisem.
Van der Bellen-i, “Hofer-i jembiba ajanga paji “Oexit” pusemer ka ta kuli angur,” ta Austria nunger dang ashi.
Ajisüaka Hokolbarnü party senden ka amendang, Hofer-i, EU den tesendaktep pilatsü anemertem jagi Austria raksatsütsü, ta ashi.
“Shibai ‘Oexit’ atema teti jembir aser linük raksaba atema tangar dak tongloktsür, parnoki pei sasa pei meyipa reprangdangtsü nüngdak aser parnoki Austria ya ni ang raksatsür asü ta bilemdangtsü lir,” ta Hofer-i ashi.
Brihostibarnü tatembang buba otoktep sentong nung Hofer-i Van der Bellen ji tiyazür ka lir, ta 24 ben tashi ashiba Kurier osangkaket ajanga metetdaktsü.