Austria o Germany nati Hungary-i nokdangba migrant-tem anioker

Hungary kübok Bicske railway station toktsür Hungary arrtsüleni anir aoba jakdang migrant tebur chanu ka bus gari telung nung nokdaka aliba noksa nung angur. (Bicske, September 05)

Vienna, September 05 (Agencies): Hungary-i par linük telungi maitdaktsüi nokdangba pei linük toktsür Europe nung jenoktsü merangertem anioktsü mechi Austria aser Germany nati par arrtsü tanü Honibar nü lapoktsüba osang jangjaogo.

Hungary arrtsü tonga bus gari 100 shi nung anir aoba sülen Syria tongpang nungi jenbotsü meranger refugee timba densemba migrant nisung 6000 shi train aser bus gari nunger nung anir Austria kübok Vienna yimti tonga anir aoba osang ka Austria police-i metetdaktsü.

Tanü Vienna yimti tonga anir aoba migrant timbakati maneni Germany bushia aoba osang ka Austria sorkar ketdangsertem metetdaktsü.

“Germany nung jenoktsü sentong alirtem asoshi train ka renemtsüba sülen parnok 450 shi Austria nungi Munich tonga anir aruogo,” ta Germany police ketdangsertemia metetdaktsü.

Migrant nisung 10,000 dak tema par Germany linük jenoktsü imlaba olen ka parnokisa metetdaktsü.

Budapest nung tentetba tongti train station nungi meindokba migrant noklang aikati kilometer 170 shi pilar Austria arrtsü tonga aotsü nükjidong nung tetsüng agi tanü apusoba osanga bushitetogo.

Ano külen, Europe nung jenoktsü meranger migrant nisungtemi mezüngsüa Europe nung tetsüng ajemokdak, Hungary-i par anülulentip tsütsü arrtsü ajunga tan September ita 15 nü tashi nung atsübangtsü renemba osang ka metetdaktsüogo.

“Christianpur timba alidak, Europe-i Muslim nunger timba densemba migrant-tem aruba ajanga Europe ajunga indang maitsü samatsütsüsa tang tensa ajurur,” ta shia, Serbia den arrtsülen police ketdangsertem yoktsü aser parliament-i agizükra, mitkartema yoka migrant nisungtemji nokdangtsü lemtetba osang ka Hungary Ato Kilonser, Viktor Orban-ia tanü sangoktsü.

Tanü tashi nung migrant nisung 350,000 shi Europe tonga aoba ajanga linük 28 densemba European Union (EU)-i tang khuret tulu benoka lir.

Tang ajurua aliba migrant den sentakba onük benoka EU foreign minister-temi tanü Luxemburg yimti nung rongdak senden ka amen saka parnoki telemtetba tajung magitetba osang jangjaogo.

Syria nunger Kurd kin tanur arishi küm 3 tain ka Turkey tzüyimkümlen tzü nung arükseta asüba noksa ka alima ajunga nung tan hopta prokshiba sülen Europe ajunga nung migrant den sentakba khuret ya tekaraba mapang nung bentsütsü asoshi alima ajungai Europe ajungshitsü tenzüka lir.

Rubber rong ka nung mener Greece bushia aodang Aylan Kurdi-ji tetsü aser tenu na den tzüyim nung arükseta asüba osang jangjaogo.