‘Autumn Huddle 2’ asayamung tembangogo

Dimapur, October 21 (TYO): Ao Students Union Dimapur-i “As One” omen nung ajemdaker ayongba anogo asem amungba asayamung “Autumn Huddle 2” Bodhbar nü State stadium nung senior vice president, Nagaland Badminton Association & Executive Council member, Badminton Association of India, Dr. Watizulu tetushi tejaoker süa tembangogo.
Dr. Wati-i, Aor dak saisapong sempet tajung keta lir, ajisüaka national o international level nung tangari metettsüsa nüngtugu makümer, kechiba süra asenok dak bendanga agütsüba, merangdangba aser teti renemshia aliba yimya agi anünga lir. Itemji melira taküm nung takok mongutettsü, ta kaketshitem ayongzüka liasü.
Tang asen lokti teraksa agi sünga lir aser mapa manguba tebilemtsü kanga ulua kümogo. State nung temelenshi tulu ka nüngdaker, aji mesüra pei aliba tesem nung asenok alar akümtsü. Kija shiai tangar tai dang mezüngshii pei melenshir kanga junga shisadanga inyakyim ajak nung temelenshi bener arutsü merangtsüla, ta Dr. Wati-isa ashi.
Pai, taruba ‘Autumn Huddle’ asayamung nungibo badminton-a enoksemang aser ibaji atema Nagaland Badminton Association o Dimapur District Badminton Association nati nüngdakba ajak nung nungittsü, ta ASTD dang nangzük.
Sentong nung organizing committee convenor, Sungkum Aier-i tepela o jembi aser Jongshimanen, Music Director, DABA-i sarasadema tembang.
Iba asayamung nung best female athlete Rongsenbenla aser Mongnaro na lemdang. Tena prongla ya Milak Rapids telok nungi lir. Ano best male athlete Meinkong Woodlands telok nungi Rongsenmeren-i angu. Pai 2013 küma asemteper rongnung tekaratiba sempet ngua liasü.
Item sempettem Naro Ki-i tenla liasü.
Asayamung nung takok angurtem yamai:-
Football (Men) : Winner- Milak Rapids, Runner Up-Meinkong Woodlands
Volley ball (Men) : Winner- Tzula Warriors, Runner-Up- Meinkong Woodlands
Volley ball (Women) : Winner – Menung Tigers, Runner Up- Arju Dwellers
Relay Race (Men):
1st- Menung Tigers, 2nd- Meingkong Woodlands, 3rd- Arju Dwellers
Relay Race (Women)
1st- Menung Tigers, 2nd- Milak Rapids, 3rd- Sungkong Bangers
Best discipline team: Arju Dwellers.