Auyi apongba lima

Meluri nung tayimtsü anendak auyi kanga apongba ajanga tayimtsü anishisangi ali mengui akümba agi tayimtsüji junga manentet tsüokba osangji asenok asoshi temenünütsüka aser taaktsüka lir. Iba tayimtsü nungji Delhi nungi aruba Home Affairs Ministry nungi ketdangser kati anir parnok kar mena lia atalok asünungji parnoki ano Nagaland tiaji tajungba metetter alitsü imlar. Ashiko, yakanü Meluri nung atalokba lendongji tsüngluruwa ka asübo tayimtsüji lishi nung ajudoker junga manenteti tsüokla ta bilemer. Tanü putu nung sorkar mapaji nübortem libaliro tajungba kümdaktsütsü asoshi sentong tajungba yanglua inyaktsü, tashidak nokdangtsü aser lanurtem shisa tenük lapokja anüng petinu nung aliba rongsen bushidaktsütsü atema inyaker. Ajisüaka, asen lima nungbo itemji inyaktsübajibo yutsür auyi aser lishi menembangtetter. Aji oda, asen lima nung temelenshi nüngdakba indang jembira, tanga temelenshi nüngdakba maparen aika alitsüa akok saka, tamasa lenmang nung auyi aser lishi agi tejaja majung akümba tensa ya melenshitsüla.  Atangji, lenmang nung auyi ponga aliba mepongi aser lishi adoka aliba madoki kümdakja melenshitsübaji tamasa nisung mulungjang aser shisatsü melenshitsüla. Nagaland nung gari lenmang teimbaka kibur mali ama kümer auyi aser lishi agi tejaja majung akümbaji kibursang temulungjang aser shisatsü majungba ajanga lir. Nagaland nung lenmang kiburtemi lenmang meyangluyonga pei atema senotsü tajangzük ngura ojang ta bilemra, nübortem asoshibo aji alima tatem amai asütsü. Aji oda, Nagaland nung yimsüsür aser ketdangser tulurtemi gari tajung saka lenmang tamajung nung auyi ponga aser lishi mezüa senzütsübaji maakra, ibaji nübortem asoshi atakatem tenzüker asütsü. Nisung o shiruru na tetsüngdaji aakba ya lir. Nisungi shitak meinyakdang aaker saka shiruru dakbo taaktsü maket. Anungji, kodang yimten aser lokti nung lenirtemi ochimashi mapa inyaktsü maaklir, itemji lenir süaka nisung masü shiruru mulungsentsü dener inyaker asütsü. Shitak nisung shisatsü adenba leniribo pei nübortem anisüngzüka meyutsütetba tamakok agi peisasa pei aakseta bilemtsü. Shitakba yimsüsüribo pei jajaba lenmang auyi aser lishi agi sünga aliba agi peisasa pei nümamedangtettsü. Aji oda, yakanü Meluri nung tayimtsü anendak tayimtsü manentettsüsa auyi apongba osang jagi Nagaland nung yimsüsür aser ketdangsertem mulungjang nung terabo akseta bilemra, iba molungjang nungji ano pei lima aser nübortem asoshi mapa tajung inyaktsü shisatsü meremsepi lir ta pelaa bilemdi. Asenok senso tajung ka süra asenoki pei lima junga meyangertetba atema akseta bilemtsü. Asen lima nung auyi aser lishi agi tesenzü majung kümdaktsüba jagi asenok mulungjang aser shisatsü sayur. Iba atemaji lenmang yanglutsü purtemi akseta bilemer asü mebilemer ? Asen lima nung sorkar school agi school  masü kümadokba tiaji ngur school anepalutsü purtemi akseta bilemer asü mebilemer ? Center nungi nübortem asoshi teyari tapu balala arur saka itemji nübortem nem shitak magütsü ser ketdangsertemi agiadokbaji akseta agir asü mesüra kecha balaka akseta mebilemer. Atangji, aueri auya-auyabo auyabaji putetyonga maaker ta jembir, kechiyong auyatsübaji pa mapa amato dang kümadoker. Ibaji mesüka asen lima nung ochimashi mapa inyaktsüba ya taaktsü mapa masü kümogo. Asen lima asoshi timtem aser shisabolutsü tulutibaji aji asütsü.  Aji oda, asen lima nung senso kar tebok mesüngteti timtema lira, ibaji tulur aser takartem asoshi maksü ta bilemtsüla. Atangji, iba tangatetbaji tilar aser sensakertem ajak dak alitsüla. Tulur aser takartemi ochimashi mapa inyaktsü maaker aser tilar aser sensakertemi meshimetsütsü maaker ta litepra, iba lima nungji auyi apong manentsü aser lishi adokpet adoktsü. Tanü Nagaland nung alir Naga nungertem dak nüchi shisatsü lira Nagaland tia ngur aakseta bilemtsüla aser pei lima yanglushitsü asoshi pei ajung masai pei lima ajungtsü bilema inyak tenzüktsüla.