Awaa Oang

Adianutem, ni küsasa aji joko puogo ta mezüngshir. Saka ni mapa ya inyaker, oda taoba amadoker tejaklen kechi lir itemji asoshi awaa oa inyaker. Filipi 3:13.
Alimai tesüiba mapa agi na arakmoker ta ashir. Na timatemba kibong ka nungi arua lira iba jagi ne taküm nem tetuyuba agütsütsü. Ne sobaliba agi na mejungi amshia lira, iba jagi ne taküm tanü aramoktsü. Ne lanuwa taküm mejungi arua lira, anünga aliba ne taküm iba denji raratepa atemtsü. Alimaji tesüiba mapa agi agidaktsür kechiaser iba yagi tarutsüji mejangjar.
Külen, khristantem nüji nung alir kechiaser Khristai asenok tesüibaji koktetogo, “Tejenbaji süitemogo aser tasenba aruogo (2 Kor. 5:17). Tsüngremi Khristantem temenen tai tokogo aser Pai aji joko mebilemtettsü mulungtetogo (Isa. 43:25). Khristantemi tesüibaji mamadoker saka iba jagi asenok mazüoker mesüra majungshidaktsür. Khristantemi teyimla agi tarungtsü nung rangloker.
Alima nüburi parnoki kechi akoker iba nung rangloker. Khristantemi parnok kechi akümtsü iba nung rangloker. Tanela Temeshi-i parnok Khrista mesüka kümdaktsü ta khristantemi metet. Khristantemi parnok mapa tatem anogo nung Khrista tsüngdang züngdangtsü aser teti tatem maka Tsüngrem den alitsü ta metet. Ochi mashiba ajak ajatsü aser yirua alir süneptsütsü ta khristantemi metet. Satan aser tasüba, tatem nung samatsü ta parnoki metet. Khristan tarutsüji tabensa aser takar iba jagi tesüiba nung kechisa süa aru ajaki atendanger.
Na tesüiba mapa agi ne taküm amokbanga lira, tarutsü kechi sentsüwangshi lir ibaji angutsü Tsüngrem dang ne tenük lapokjang ta shiang aser Paul ama tejakleni awaa aotsü tenzükang.