Awana Kids Ministry tenzüker Art Rorheim süogo

Aenjeti 09, 2018 (Agencies): Art Rorheim ya tanurtem indang ministry tenzüker rongnung ka lir. Alima ajunga nung aliba Awana co-founder ya Rogonü, Aenjeti 5, 2018 anogo kaket reju sentong ka nung dener asü.
“Awana ya alima ajunga nung lir, koba taa maden tanurtem indang ministry nung bendanga agütsür inyaker, kechiaser Tsüngremi sayuba ya temeim meteta aliba tanurtem dak nungi tenzüker aser Pa tenzüker,” ta Awana indang website ajanga ashi.
Rorheim ya tepela agi sünger aliba taküm ka aser pai taküm meima Lai tekong ajunga temulung nung jungjunga angaoka lir aser item Lai tekongtem ya Awana sentong nung amshi. Pa indang taküm otsü ajanga ashiba agi, pa asoba tesem, Chicago nung arishi küm ter asüdang teti asüba sülen Tsüngrem agizük.
“Pa mulungjang nung tejangraba ajunga agi tila-tanurtem dang osang tajung sayua tamangba yimsü nung lenir ka kümdaktsütsü asoshi shisatsü agütsütsüba liasü,” ta pa indang taküm otsü nung shia lir.
Arogotem asoshi 1950 küm tenzükba Awana (Approved workmen are not ashamed) tenüng ya 2 Timoti 2:25 nungi agizük, koba nung, “Aser pei anema nokdakbatem dang ajemalu agi metongshijang; ashiko ochi metetba dangi temulung meyipbaji Tsüngremi parnok nem agütsütsü,” ta shia lir. Iba sentong metenzükba mapang Sunday school dak alaka tanurtem aser lanurtem asoshi ministry tila ka liasü.
“Tsüngrem asoshi nai tanurtem akoktsü asoshi parnok peladaktsütsüla. Tanurtem ya alima tesem ajak nung kasa dang lir aser temeim sayurtem dang parnoki langzür,” ta pa indang taküm otsü nung pai ashiba zülua lir.
“Lai nung ni kodanga ‘mapa nungi anenba’ mongutet,” ta Rorheim-i shia liasü. Pai tanurtem indang ministry ka tenzük aser tangbo iba ministry ajanga linük 100 nung tanur million pezü tongtetogo. “Taküm piyong pai anibülem memeteti osang tajung sangdong aser alima nung tanur, tetsü aser tebu million nem iba osang agütsütsü asoshi Khristanpur lenirtem nem iba tesayuba agütsü,” ta Awana indang CEO, Valerie Bell-i ashi.
Art Rorheim bilemtetba sentong ka Quentin Road Bible Baptist Church nung Küptoknü, Aenjeti 27, 2018 nung agitsü aser tesemdangertem asoshi anepdang 9:00 ako nungi 10:30 ako tashi lapoktsütsü aser sentong ya 11:00 ako nung agitsü. Iba asür bilemtetba sentong nung tenla ya Art Rorheim Legacy Fund nem agütsütsü.