Award angutsü atemabo film meyangluner: Arbaaz Khan

Noida, February 18 (Agencies): Arbaaz Khan-i ashiba agi, actor ka amabo kechi shilem südir süang agitsüa akok, saka film direct aser produce asüba nungbo film ajaki saputsüsa dang yangluner.
“Director ka amabo ni teti ajaki sapua agizükba film tem dang yangluner. Ni file tem award angutsü asoshi mesüra mashi mashi film meyangluner,” ta Hokolbarnü Jeena Isi Ka Naam Hai film atema osangbenertem den jembidang Arbaaz-i ashi.
“Film ka junga yanglutetra iba ajanga lokti tuluba puatsü, aser award-a angutsü akok, koba ‘Dabangg’ film-i ngutetogo. ‘Dabangg’-i National award nguogo aser box office nunga jenjang tajung tongtetogo. Nai award angutsü atema dangbo film meyanglutsüla. Ni award angutsü asoshi kecha jangra mali,” ta paisa ashi.
Arbaaz shiba kinungtsü actress-model Malaika Arora Khan den balaogo, pa taküm indang asüngdangdang pai yamai ashi, “Nü taküm nung tatalokba kechi südir süang nai shimtsü akok. Nai tesüiba mapangtem reprangshia idak nungji agi tangazükba ka kar tejaklen aotsü akok, mesera idakji jidaker alitsü akok. Taküm nung senotsü tsütsü, kinunger asüama mesüra nisung den tesendaktep nung tamakok aser tesama ajurutsü akok, saka aji meimchir yimya.”
“Ni nisungtemi kü nem film nung kü dak apet shilem agitsü asoshi maongka agütsü dang atar. Ni kecha imla matar. Kodang kari kü dangi arur parnoki shilem nung ni shilem agitsü peta lir ta bilemba agi dang arur, anungji ni parnok dak tamang akar,” ta film nung kechi komala shilem aginür, ta asüngdangdang pai langzü.
Film produce asütsü asoshibo kanga ashishir, saka film nungbo yamaji masü, ta Arbaaz-i ashi.
“Küm ka nung ni actor ka ama film pongu troka yanglutettsü, saka director ka amabo ni film aika nungbo shilem magitettsü. Actor ka amabo ni shilem tasen nung shilem agidangtsü jangrar saka direct asüba nungbo ni kanga kümdanga shimer,” ta Arbaaz-i maneni shisem.
Keshav Panneriy-i direct asüba film “Jeena Isi Ka Naam Hai” nung Arbaaz den külemi Himansh Kohli, Manjari Fadnis, Prem Chopra, Ashutosh Rana aser Supriya Pathak nungertemi shilem agir. Iba film March 3nü sayatsü. Iba film sülen sangküm küm tetenzük nung Dabangg 3 yanglutsü asoshi mapa tenzüktsü, ta Arbaaz-i ashi.