Award meyipa agütsüba ajanga kecha majangzüktsü: Pranab

New Delhi, Nov. 16, 2015: Hombar nü New Delhi nung National Press Day anogomung nung Tir Pranab Mukherjee-i Journalism indang National Awards agütsüba noksa nung angur. Noksa nungsa Minister of State for Information & Broadcasting, Col. Rajyavardhan Singh Rathore, Press Council of India Chairman aser Justice Chadramauli, Kumar Prasad-a angur.

New Delhi, November 16 (Agencies): Linük nung tamangba lokti tsüngda akhümtsübutep maliba onük nung o toktepba dak sentakba nung Tir, Pranab Mukherjee-i aiben jembia aruogo aser Hombar nü pai India nunger kaket ken o zülurtem aser film yanglurtem dang, award meyipa agütsüba ajanga kecha majangzüktsü, anungji parnok mapa tajung atema award agüsübaji senti süa agitsüla aser tebilemtsü onüktemji o toktepba aser o lemtepba ajanga bentettsüla, ta ashi.

Tanü New Delhi nung National Press Day anogomung sentong nung jembidang Tir, Mukherjee-i “Akhümket awards ji… maparen balala nung lenirtemi sempet tajung, merit aser meranga inyakba ajiteta agütsüba tetushi lir. Item ama awards agizükertemi ibaji senti süa agitsüla,” ta ashi.

“Lokti nung tatalokba kar ajanga süoki ia agirtembo minpronger, ajisüaka item ama tebilemtsü benokba nung liromedemtsüla,” ta pai ashi.

Award meyipa agüja lungkak aitertemi kanga süoki ia bilema meshisadangtsüla, mangatettep onüktemji o lemtetpba aser o toktepba ajanga bentettsüla, ta paisa ashi.

“Nüma tangteter India senso ka ama asenoki India tangatetba aser asen Temzüng nung aliba telatetbatem nung melung alemtsüla. Nüngdakba mapang shia India-i teti pei sasa metongshiteta aruogo,” ta Pranab Mukherjee-i ashi.

Taküm Kannada nunger kaketzülur aser rationalist, MM Kalburgi tepsetba aser Uttar Pradesh, Dadri nung nashi shi achi ta tai tonglokja lokti kati Muslim nunger ka tepsetba tatalokbatem nung ajemdaker kaket züluretem, film yanglurtem aser artist tem nisung 100 jungnüai linüki agütsüba award meyipa agütsüogo.

Lungkak aitertemi Centre nung BJP-i aniba sorkar nem tai tonglokja, India nung Muslim nunger anema tesempa mapa inyakba aser right wing teloktemi senso ochi temeten anema inyakba atema sorkari kecha meinyaker, ta shia lungkak aiter.

Iba onük nung ajemdaker Tir Mukherjee-i anaben tashi linük nung nüburtem tsüngda akümtsübutep aser yimjung nung alitsü ayongzükogo.