Award meyipa agütsüba ya temaitsü ka lir: Shabana Azmi

Mumbai, November 01 (Agencies): India tsür actress tain, Shabana Azmi-i, linük nung mepetmesü adokba anema kaket ken o zülurtem, shisashirtem aser film yanglurtemi lungkak aita awards meyipa agütsüba ya temelenshi ka adoktsü atema temaitsü ka lir, ta ashi.
“Artist temi award meyipa agütsüba ajanga parnok mapa agi parnok tebilemtsü akabaji sayutsü, ajisüaka film ka yanglutsü aser kaket ka zülutsü atemabo mapang kanga agir. Award agütsüba ya temaitsü aketba mera ka lir, koba ajanga nisungtem atsüer arur. Ibaji aitsütsü melenbo, iba jagi sayuba temaitüji reprangtsüla,” ta Shabana-i twitter ajanga ashi.
Taoba hopta kaket zülur nüngtugu nisungtem- Ganesh Vispute, Sambhajai Bhaga, Harishchandra Thorat, Pradnya Pawar, Milind Malshe, Yeshu Patil, Vasant Patankar, Urmila Pawar aser Mukund Kale nungeri award balala meyipa agütsüogo.
Iba den külemi Mumbai nunga film yanglur kari parnoki anguba National Awards aser tanga award meyipa agütsütsü ta sangdongogo.
Film yanglurtem rongnung Anand Patwardhan, Dipankar Banerjee, Paresh Kamdar, Nishtha Jain, Kirti Nakhwa, Harshavardhan Kulkarni, Hari Nair, Rakesh Sharma, Indraneel Lahiri, Lipika Singh Darai, Vikrant Pawar, Rakesh Shukla aser Prateek Vats nungeri FTII kaketshirtem pusema award meyipa agütsüogo.