Award meyipa agütsübaji akhüm mezüngshiba lir: Shashi Tharoor

Thiruvananthapuram (Kerala), October 15 (Agencies): Linük nung nüngtugu kaketzülurtemi Sahitiya Akademi awards meyipa agütsüba dak sentakba nung Brihostibar nü taoba mapang Union minister aser Congress MP, Shashi Tharoor-i, kaketzülurtemi pei tangatetba zülutsü atema noktaktsüji temeten lir, ajisüaka award meyipa agütsübaji akhüm mezüngshiba lir, ta ashi.

“Kaketzülur kari Akademi awards meyipa agütsüba atema ni sasa bilemer. Award ya shisaliok, azüng-züluba, purapitetba mesüra academic nung züngshiba lir. Iba ya yimtenren inyakyim ka masü,” ta Thiruvananthapuram (Kerala) nung sentong ka tembangba sülen Tharoor-i osangbenertem dang ashi.

“Sahitya Akademi ya independent institution ka lir aser onok indangji yimtenren lir. Kaketzülurtemi iba ana ya meyokteptsü menüngdak ta ni bilemer. Tang tzü-mepong atema noktaktsüla, sadoka alitsü atema noktaktsüla, ajisüaka iba award akhüm yabo mezüngmeshi masütsüla,” ta pai ashi.

Kaketzülur aser ocet zülur Tharoor-isa, “Award ya kaketzülurtemi inyaktetba mapatem atema loktii agütsür aser parnoki inyaktetba mapatem aser tenüngsangji meyipa magütsütettsü,” ta ashi.

Ajisüaka Tharoor-isa, khen nung kaketzülurtem aikati parnok temeten atema nokdakba atema pelar, ta ashi.

“Kaketzülurtemi benokbaji tim dang, kechiyong kaketzülubaren jenjang ajungtsü atema ‘intellectual freedom’ nüngdak,” ta Tharoor-i ashi.

Linük Temzüng nung pei tebilemba sadoka jembitsü temeten agüja lir ta shia Tharoor-i, “Asen tezü nung azü jajaba mesüra kolom nung ‘ink’ ayimba ama pei tebilemba sadoka jembitsüji nüngdak,” ta ashi.