Axis Bank ATM booth kakpoka auyasang puogo

Dimapur, Aenjeti/January 14 (TYO): January 12 aonung High School Junction anasa Vishal Mart, Kohima opposite nung aliba Axis Bank indang ATM booth raksatsür ATM nung aliba sen auyar ao. Iba osang angazükba sülen Kohima Police-i yakta mapa inyak tenzük aser auer aputsü aser sen meyipa agitsü asoshi bushitsüngdang tenzük.
January 13 nü M. Yambemo Humtsoe, SDPO (North), Kohima lenisüba kübok bushitsüngdanger team kati Dzuvileto Natso (29 yrs) apu, shiba Cash Management Services (CMS) nung inyaka liasü. Maneni ken o bushitsüngdanga aoba mapang ATM nungi auyar aoba sen 21,14,000/- (twenty one lakhs fourteen thousand) Razhü Point nung aija alisang aliba kidang lia ngutetogo.
Iba masüdang police temi sen auyar aoba tesem nungi sen 10,16,500/- (ten lakhs sixteen thousand five hundred) ngutet, koba auersangi toktsür aoba liasü. Sen ajak senteper police temi sen 31,30,500/- (thirty one lakhs thirty thousand five hundred) ngutetogo. Iba dak sendakba nung North Police Station nung ken o ka benokogo aser maneni bushitsüngdangdar, ta PRO Kohima Police sangdong ka ajanga metetdaktsü.