Aya agi masütsüla

India nung sensakertem aya agi mesüdaktsütsü asoshi jang seret nung sen asem agi agütsür. Ano, chi mechiyongba agi school-i moutet masütsü atema government-i school nung tanurtem anüngdang chiyongtsü agütsür. Iba denji ano sen makaba agi jangotsü malitet tim medemdaktsütsü atema government-i küm nung anogo 100 ayangdak mapa agütsür. Ano, osang tajung kaji India nung züsentetba chiyongtsü agi India nung alirtem perir anünger, anungji tangleni yoker. Iba ama yimjiyimjung putu ka nung tan Mongolbar nü New Delhi nung kibong ka nung jala asem tashi aya agi asüba osang agi linük ajunga aoksadaktsüogo. Iba kibong nung tebu ayangi orr maru tsüngda tetsüi par chirtem nem chiyongtsü magütsütet anogo ti lumiba sülen jala asemji süa adok. Item jalatemji ka küm 8, ka 4 aser tanutsülaji küm 2 tain liasü. Mongolabar anepdang tetsüi jala asemji mozü kidangi bener aru saka idangjibo jala asemji süadoker liasü aser tetsüjia lumisüker o junga mejembiteti mozü kiji atong. Jala asem rongnung tantsülajibo schooli aor, anungji labo school nung anüngdangbo chiyongtsü ngunütsüka saka government-i anüngdang chiyongtsü agütsüba jangotsü agi parnok school matonger. Ibaji New Delhi nung tatartem adenshia o lemtepdak tatar hoho nungi kilometer ter shi dang pilar atalokba otsü lir. Iba tatalokba osang angashidang, Parliament nungi kopi moi yamai ataloka alinung, lenlang nung aliba tesemtem nungbo sensakertem komaka timtemdar asütsü ta shisabolua bilemer. Atangji, yakanü Delhi nung atalokba amato India tesem balala nung anogo shia ayaba agi nisung südagi. Ibaji linük nung chiyongtsü maka ayawara aruba agi masü saka chiyongtsü shitak malemba ajanga lir. Külen nisung aya agi asür aser külenbo jangotsü ayudak yoker meyokma aser chir mechiyongma shidokdaktsür. Linük nung sensakertem asoshi jenjang dalang agi jangotsü state shia nung agütsür, ajisüaka sensakertem ket iba jang jagi matonger, anungji shishilembadak sen tasak agi alia chiyonger. Tejashitsü aser tezüdangtsü kaji, asenoki bazar nung sen tasak agi aliba jang to asenok nem seret nung sen asem agi ayoktsü bener yokba jang asütsüa akok. Iba amaji sensakertem shilem rakzüka nisung aika takar akümer aser yamaji kar takar akümba agi nisung aika sensak tiai yoker aser aya marem kar peisasa soseta asür aser kar lumiseta asür. Alima nung masür mali, tasor temang asütsü, ajisüaka makaba agi lumiseta asübaji tasürtem asoshi dang masü saka yimten, lokti aser arogo asoshia tamakok aser maksü tuluka lir. Kasa linük, kasa yimten kübok aser kasa sensosangertem saka kar chir mechima endoker aser kar chiyongtsü maka lumiseta asür ta asüba limaji temulung ashitsüka lir. Pei lima nung pei ki anasa nisung kar chiyongtsü makabaji takar- tulur aser yimsüsürtem atema temenünütsüka masütsüla. Ibaji parnok asoshi tamakok lir a bilemtsüla. Yimten yimsüsürtem asoshi balaka nisung ka danga chiyongtsü makaba agi lumiseta süra aser mozü malitetba agi taneptsü mengutet süra itemji parnoki nübortem asoshi bilema meinyakba agi asütsü. School nung anüngdang chiyongtsü asoshi yokba jangotsü danga shitak angu asübo, Delhi nung jala tantsülajibo mesüla aser sen asem agi jang alitettsüsa angu asübo jala anajia mesüla ta bilemer. Tanü asen lima nunga kasa tia nung kibong aika tesama aser takoksa ngudagi. Government sentong teimbaka sensakertem yaritsü aser makamaitertem ajungkettsütsü asoshi lir, anungji sen teimbaka item sentongtem nungji endoker. Ajisüaka, sensakertembo tesensakba aser takar-tulurtemang takarba ta küma aoba angur. Alima nung ya nisung ajak khen dang lir aotsü. Iba mapang tatsüka nung sensaker aser makamaitertem indang agi kiojen yanglur yangji chiajema monger aotsübaji jangratemtsükabo masü. Atangji, tetenzükdangbo tepelatsüka aser jangratemtsüka amato asütsü saka taküm tatembangjibo tejashitsüka asütsü. Itemji angateta yimten nung yimsüsür aser ketdangsertemi linük nung nisung shinga ayaba agibo mesüdaktsütsüsa nübortem kanga meima tenzüktsüla.