Ayako ! Nagaland

Nagaland ajungtsü inyakerbo mali saka Nagaland tenüng nung tagitsü bushirtem dang adenshia aliba yagi Nagaland teti shiranger. Joko, Nagaland nung ochi samadoker ajak tiyazü dang kümogo. Aji oda, department shia nung mapa inyaker tenüng tiyazü enoka yur ita sen achirtemji asenok; school nungbo tazünger mali saka tiyazü tanurtem tenüng nung senotsü agizüka agirtemji asenok, lenmang yanglutsü asoshi sen aika lemzük saka lenmang meyanglu ser sen ajak agizüka agiba purtemji asenok, mozü kidangbo yipten kata shitak maka saka mozü ki aser shirangertem tenüng nung senotsü agizüka agirtemji asenok; tenüngbo nübortem saka tagitarutsü aser tachitajemtsü agibo nüborem ket matonger. Aluyimertem asoshi aruba teyari agi aluyimertem masü saka tulurtemang alu ayimer, anungji aluyimertem jenjang tajungba akümtsü melen, meyiper, aluyimertemji tulurtem lu nung ayanger akümer. Angati taneptsü ana nung angutsüba ser nung asenok ochimashiba ajanga government mozü kidang taneptsü mengutet Gauhati leni aor, idangjibo tashidak tuluba kümdaktsür ali kimong ayoker aser sen apua bener Gauhati nungi Delhi leni mesüra Vellore leni aor . Iba amaji sentsüh aika tsüa senzür tasümang bener arur. Itemji asenok lir. Angati education tajung angutsüba government school lapoka yur, okrongseta sen aputepa tanurtem private school nung züngdaktsür aser küm tatem nung tuition fee magütsüba ajanga nür chir result magütsütsü ta osang arur. Ibaji tsüraburtem asoshi kodaka maksu aser tebilemtsü lir. Item tsüraburtemji asenok lir. Item timtem aser maksütem nungi asenok nüchiso angutsüla. Tangbo asenok ya alar, kechiyong tulurtem lui ayangi moura chiyongtsü maka, asenok mozü kidang taneptsü mangur asünungji asenok aneptsü asoshi tangar mozü kidang dak nendaka lir. Asenok school nung education tajung mangur asünungji education tajung angutsü asoshia asenok tanga lima nung tangar school dak dang metaloka lir. Gari jajaba lenmang tsütsüa asenokbo lenmang tajunga kata maka aser Assam majangra asenok pei ki metongtettsüba tia nung asenok lir. Itemji jungjunga bilemdangra, shitakba alartemji asenok ya lir. Aji oda, Nagaland nung joko takar aser sensaker na telok balala kümadoknungji, sensakertem lima yabo takartemi angula masü kümogo. Iba  ama tia nung sensakertemi takar aser tulurtem dang pei timtema meshitet kümogo. Iba jagi nübortem asoshi terenlok mapa inyaktsüba sen ajak mapa meinyak ser achiyonga tai apur mali, sademsadema awazür. Ayako, Nagaland ! ta ajeptsüba putu tensa ka nung, tang ya tsüraburtemi Nagaland nung lanurtem aniokja lir. Onsara aka aser onsara ulunungji takar aser tulurtemi sensakertem timtemba ya mamanger. Chiyongtsü makaba timtem, süoshi alitsü makaba timtem, mozü süngjang kata malitetba timtem, gas stove makabajibo yutsür yimdong nung janaona bendena soruchiokba timtemtem ya tiyazü amato bilemer. Aji oda, kenü bus mejaja nung nübortem koda takoksa angur, itemji yimsüsür aser tulurtem mulungjangi yimdangia marur. Iba amaji Nagaland asoshibo tagütsür mali temeshir aser techitsür dang, ayako ta asatsüsa, temeimtsüka Nagaland soru kanga mejungi raksaogo. Ibaji shibai yanglushitsü. Tang ita shia government melenba yabo Nagaland tajungba küma yanglutsü asoshi melener masü saka pei jenjang ajungtsü mechi asayateper dang lir. Idaki shinga majangzüktsü saka ajak akoksatsü. Joko, Nagaland yanglutsü asoshi Naga nunger lanurtem adoktsüla aser tsüraburtem jakla melenshitsüla. Lanurtemibo Nagaland nungi kechi angutsü ta masü saka nia Nagaland nem kechi agütsütsü ta asüba tangatetba nung yimten aser lokti nung shilem agitsüla. Joko, Nagaland dak ojang mesükdi. Ita sen atema mesüra side income bushia Nagaland yimten nung meinyakli saka inyaker asoshibo taa lir ta angateta, nübortem dang meima Nagaland ochishia tenzükdi.