Ayar asü? Tangbo Facebook app ajanga chiyungtsü mangatettsü

San Francisco, October 14 (Agencies): Online ajanga chiyungtsü manga achitsüji mapa kanga tebenja lir, kechiba süra nai chinüba chiyungtsü mangadang apps jenti lapoka amshitsüsa akümer. Ajisüaka tang nungibo Facebook-i iba mapaji kanga temela kümtsüogo.
Internet amshirtemi tangbo parnoki chinüba chiyungtsütem Facebook indang app ajanga ngutettsüsa lenmang lapoktsüogo.
Facebook-i iba app ya yaküm küm nungi tendangyonga arudar aser feedback arubatem dak ajemdaker partner aika inoksema, par company-i US nung iOS, Android aser desktop amshirtem atema ibai tenzük.
“Iba pick-up mesüra delivery asüba mapa official süa sayaba ajanga tanü onoki mapa agiteta nai chinüba chiyungtsütem Facebook nung jangja metettsü,” ta Local nung Tatong Tir, Alex Himel-i Hokolbarnü pa indang blog nung metetdaktsü.
“Nüburtemi parnok anasa aliba restaurant tem indang jangja meteter Facebook ajanga parnoki chinüba chiyungtsütem bushitsü tenzükogo, anungji onoki iba mapa ya kanga temela kümdaktsüogo,” ta Himel-i shisem.
Iba sabang amshirtemi parnok chia jemnüba chiyungtsütem balala bushitsü asoshi tesem aika nung bushiba mapa kanga ajema kümdaktsütsü asoshi Facebook-i chiyungtsü anguba tesem aika den lokteper inyaker.
Tesem nung aliba nungi tenzüker linük rangben nung aliba tashi nung Facebook-i iba sabang amshirtem sendaktepa kümdaktsütsü.
Tamshirtemi anasa aliba restaurants tem ‘Order Food’ section nung aliba ‘Explore’ menu ajanga browse sütettsü. Browse asüba sülen ‘Start Order’ nung click süa chiyungtsü mangatettsü.