Ayatai CoronaVirus

– I. Tangit Imsong, Tuli Town.

Oh ! Tamamatsü, tetsüputsü Corona Virus,
Nü tenüng tetezü;
Alima meimchir ajak menatepdaktsüba tasüba wara lir.
Alima nung nüngtoko nisung, nüngtoko lima
Aser tepur tajung lima aika lir
Saka itemji-a ajakiba mangashi aser memetet.

Saka Oh ! Na Corona Virus alima meimchir
Tulu tila, takar maker, tanür tain ajaki tetsüpu agi na meteta lir
Na ama alima ajak okrongdakja tsüputeptsüsa
Kecha-asüdanga mataloka ni,
Anungji alima matem tashi kodangsa shibai bilemtetdir
Meimchirtem asükshijang merongtsü.

Oh ! Corona Virus nai alima rangben amokshidaktsür
Chubatem aser yimsüsürtem jenokdak maka,
Shisa rama nung tepetzük nütsüng ka den saku jenjangi aludaktsüogo ni,
Nai tulur tilar shinga ajioka mali, Tapayutsü taküm jenti lalutsüogo ni,
Nai tasümangji anüng ozü aser arem shiruru
Nem chiyongtsü agütsü Yer. 16:4.

Oh ! Corona Virus, na tila ka dang, Saka yimti yimdong ajak
Tsüngdangpi konga azüngmeyakdaktsüogo ni
Anünglak nung yimzüba garitem,
Tzüyim nung jajaba Jahaztem
Ali nung motuzüba talongtsütem
Ajak tagidak maka kümtsüogo.

School, College, University, Tekülem ki
Alima ajak nung nai shipangtsü,
Lokti longsolongben nai senshidaltsü, Shishilemba tesem ajak samatsüogo
Akümlir pokyimdak maka kümdaktsüogo, alima rangben tebelemtsü ka dang,
Amang sangwa memetet ayip majanger.
Ya shiba mechi, Ayatai CoronaVirus.

Alima kinük pzü nung tang otsü mali
T.V lapokra CoronaVirus, Radio lapokra CoronaVirus
Osang kaket lapokra CoronaVirus, Mobile lapokra CoronaVirus
Call süra CoronaVirus tama arur
Lokti senden ajak nung CoronaVirus
Ya kechi sayangtsü Oh ! CoronaVirus.

Alima kin tashi tulutem ajak Bomb aser injang medeni amokmerenogo.
Anü maluba England yimli Chuba dak kongshi
London yimti yimdong hon agi menokba
Menena asür kima manga-a meyimzü ama tütayar mali yiprep aküm
Alima nung tepur tajung yimtitem ajak
Shimak shimaka kümtsüogo ni.

Alima rara tasembuba atema Alima kintemi kanga tsüputepa alidang
Tanü CoronaVirus-i ajak ajatetogo
O lemteptsü sapang maka oshi maka
Nüji mali, temeimji pai memetet
Tejak merepranger aser atsü-anem maker
Ayatai CoronaVirus.

Oha ! CoronaVirus nai meimchir ajak
Taru tao ajaklen teka metsükdaktsür (sanitizer)
Saka tachitsübo maka nung tepang nempangtsür (musk)
Alima meimchir aya agi sümadarji
Joko alimai na sembar aser atakatemer
Aser onok tamang teimla ka lir
Teyanglur Tsüngremi na arüjang Isaiah 25:8
Oh ! Na CoronaVirus Ayatai.

ANGAJEMTSÜ

Kibuba küm meyi ka noklang ponguser tenemser ka (1551 A.D) nung French nunger Astrologer aser Physician ka tenüng agi Nostradamus-i yamai zülu. –

“Iba jakrep küm 2020 (twin year) nung anüdoklen lima ka nungi Chubatsür ka Corona adoktsü, aser manger mesangwa nung tasü wara (plague) alima sünga proktsü aser nisungtem aot aoyi küma alima raksatsütsü ta ashiba tanü China lima nungi Italy tenem 7 lima tashi tasü wara agi kangshir. Iba ya Tsüngrem O dangi meyipra Yermia kaket 16:4 nung ashiba tanü ataloker ta angatetdi.

Anungji asenok züzüa melili saka Tsüngrem tali bushidi. Süra pai asenok daknungi iba timtem ya agientsü ta shia lir. – Isaiah 25:8.

AMEN