Ayatsü asoshi rungang (2 Korint 6:1-10)

“Pa ulutsüla, saka ni asütsüla” (Yn. 3:30)
Yohan Baptitsüba Tsüngrem asoshi ayatsü asoshi pasasa arungba ama inyaktsü asenok aja (Yn. 5:35). Asenoki Yisu asoshi yadaktsütsü jangrar saka Pa asoshi arungtsü asenoki renema mali. Asenoki electronic bulb ama süner; saka Tsüngremi temo milen koba yimsaa aoba ajanga sangwadaktsür aji repranger. Hudson Taylori (1832-1905) China lima nung Tsüngrem asoshi missionary mapa nung arung. Pai Khristantem ayongzüka ashi, “Tsüngremi tarungtsü angsü kar bushir. Totzü aser mi angati!” Kangki apuba aser peisasa azüokbaji anogo ka mapa masü. Ibai taküm tepiyong inyakba ka lir. Tenyar Pauli pa taküm azüokba indang tatsü agi 2 Korinth 6:9-10 nung zülu, “Ni masü saka Khrista!” Pai kuli asü, “Onoki shingaia memetetba amai, saka jungjunga metetba; onok tasü aliba amai, saka ajiang onok taküm lir, onok kecha maka amai saka onok ajak kar!”
Sayutsüngir D.L. Moodyi (1837-1899) ochi shia nangzük, “Ni ajuruba nisung dang nungi ni D.L. Moody tebilemtsü tuluba kar! “Pei sasa azüokbaji tematiba tenla lir. Ibai pei shi jangraba aser alima nung peisasa temaba jenjangi tunüba dang masü” ta ashiba lir (1 Yn. 2:15,16). Pei sasa azüokba mapa shia jagi asenok Khrista dangi tejakleni odaktsür. Nisung kati pei nungi aludang Tsüngrem nung atur. Ni asoa maküm tashi Khrista kü dak ulutsü makok!
Asenoki Yisu sülen anidaker süra lemang nung tarütsüba, mezüngmeshiba ajurutsü renema alitsüla. Amang ghonda minute nungi tamangertemi pei taküm Tsüngrem yimli asoshi agiogo ta bilemtsüla. Yisu yimti tezülen kangki nung angenlok. Asenoka Pa den yimti tezüleni aotsü aja (Ibri 13:12,13). Kati kuli süa linüra telunglen aser tezülen nungi aruba tashi anema mapa inyaktsüla. Arogo otsü aser alima otsü nunga asenoki “pei sasa bendanga agütsübaji” aitokra kaketji tazüngla asütsü. Africa ammang lima nung David Livingstone (1813-1873) pa kisüngi tebutsü tasümang arem. William Carey (1761-1834) Bengali missionary aser Laishiba meyiper ama aru, pai pasasa pa tebutsü asüpila sentep agi. Iba ama tenla milen tang tashi arunger!
Kü milen totzü agüjang, ni runga lidakjang; Kü milen nung kü nem totzü agüjang, ni sarasademer, Kü milen nung kü nem totzü agüjang, ni runga lidakjang. Anüngdang maru tashi runga lidakjang!