AYO aser GPRN/NSCN(U) tsüngda ken o angatettep

Dimapur, August 29 (TYO) : August 19, 2016 nü Kohima nung Region Commander, Angami Region Pitovi-i AYO züngsem Pelevilie Kuotsu dak teka sangshiba onük atema AYO aser GPRN/NSCN (Unification) nungi nübotem tsüngda ken o angatettepogo, ta AYO vice president Keklhrievolie Keyho aser gen secy. Rokoketuo Sechü nati sangdong ka nung metetdaktsü.
Iba ken o ya Chairman Angami Region aser Deputy Kilonser Home nati anir ketdangsertemi senden balala amenba sülen angatetep.
Tatalokba atema sasa bilemba aser AYO-i takoksa ajurur tenüng nung takhangba kar agütsüba agizükba sülen iba ken o angatettep, ta AYO mendenpurtemisa ashi.
Iba tatalokba osang angashia nisungtemi takoksa ajurur pusema nungitba aser aibelenertem aitsüba atema kanga pelar. Linük tenüng nung saru saruba aser tashiyim mapa anentsü atema AYO-i maneni takhangba agütsür aser iba tatalokba dak sendakba nung nisung ajaki telemtetba agiba pusema nungittsü mepishir, ta AYO mendenpurtemisa metetdaktsü.