AYO-i Civil Secretariat aser Assembly-i anir sorkar office tem shibangtsüogo

NST, NBSE, NPSC, Fire, Telecom office tembo menokdanger

Kohima, February 4 (TYO) : Nagaland Tribes Action Committee (NTAC) Kohima-i state yimtiba nung sorkar office tem melapokdaktsütsü ta lemtetba pusema Angami Youth Organisation (AYO)-i tanü State Civil Secretariat aser Assembly-i anir tanga office tem shibangtsüogo.
AYO volunteer temi parnok telongtet sasep nung Kohima kübok tesem balala nung sorkar office tem shibangtsü aser AYO maitsü yutsü.
Osang ka ajanga ashiba agi, Secretariat aser Assembly nung CRPF aser tanga force nungi tanükertem liasü aser parnoki AYO züngsemtem nokdangtsü merang, ajisüaka AYO züngsemtemi sepaitem dang parnok Naga nunger alizüng atema timi dang iba mapa inyaker anungji parnoki (sepaitem) iba mapa menokdangtsüla ta metetdaktsü. Iba sülen AYO-i kishi tongtiba shibanga yutsü.
Iba tenokdangba kübok Fire & Emergency Services, Postal, Nagaland Board of School Education, Nagaland Public Service Commission, Nagaland State Transport aser Telecom department tem maitdaktsür, anungji parnok tetsübu kecha melii mapa inyaksangshia otettsü, ta AYO President Neinguvoto Krose-i metetdaktsüogo.
Yashi NTAC Kohima-i tanü nungi public aser nija maparen ajak lapoktsü saka sorkar office aser garitem anema mokdangba magientsü ta metetdakja lir.
Onük asem asoshi takhangba agütsüba ama telangzüba mangu tashi sorkar anema mokdang ayongzükba maneni alitsü, ta NTAC Kohima-i ashi.
Sorkar anema mokdangba mapa inyaktsü atema AYO nem mapa nungloktsü anungji ozü züngsemtemi office tem shibangtsü, ta Krose-i metetdaktsü.
NTAC Kohima-i Chief Minister T R Zeliang aser par cabinet anenang ta ashiba ama meinyak tashi NTAC Kohima aser Angami Public Organisaiton (APO)-i inyaktsü nungloktsüba ama, AYO-i state yimtiba nung sorkar office tem melapokdaktsütsü, ta AYO President-isa shisem.
Krose-isa ashiba agi, asüng Deobar asüba agi, tenokdangba kecha malitsü saka sorkar garitem mokdangbabo alitsü.