AYO-i Kohima nung gari lenmang yanglutsü mapang agütsür

Dimapur, November 2 (TYO): State sorkar, BRO/BRTF aser department ketdangsertem den sendentem aliba sülen Kohima nung Angami Youth Organisation (AYO)-i bangdakpur nem tang teinyakdak gari lenmang yangluba mapa inyakdaktsütsü telemtetba agiogo, ta AYO Vice President Kekhrievolie Keyho aser Press Secretary, Tsotuo Sale nati sangdong ka nung metetdaktsü.
Mapa nung amdaka alirtemi public atema mapa junga inyaktsü ta nangzükba sülen AYO-i parnok nem mapa inyaktsü temelaba agütsütsü lemtet, ta sangdong nungsa shia lir.
Chief Minister, T R Zeliang aser Minister PWD (R&B) Vikheho Swi nati Nagaland nung terenlok mapa inyaktsü sentong atongba aser inyakba atema tena dang pelar. Talisa Chief Minister-i state yimtiba nung nüngdakba mapa inyaktsü atema senotsü lemzüktsüba atema pa dang kanga pelar, ta AYO-i sangdong nung shia lir.
Kohima jila aser temeket nung aliba gari lenmangtem hopta ana tsüngda yanglushitsü anungji Kohima nung alirtemi ketdangsertem den yariteptsü mepishir, ta AYO-isa metetdaktsü.
Public nem service agütsüba nung timtem majurutsü atema PHED, water & cable pipes, Telecom aser talisa OFC sectors nungeri pei mapa reprangshimtsü metetdaktsür ta AYO-isa tetuyuba agütsüogo.
AYO-isa State Quality Control Board dang tang inyakba mapa reprangshitsü ayongzüker. Sorkari nangzükba nung tamang kaa atar aser mapa mejungi inyakra AYO-i iba asoshi yimjak nung mapa inyaktsü, ta AYO Vice President aser Press Secretary natisa metetdaktsü.