AYO-i Kohima shibangba lapoktsür

Dimapur, Rongchii/April 15 (TYO): Angami Public Organization ajanga tetsüngtai aita mepishiba ama Angami Youth Organization (AYO) ajanga Kohima tesem ajunga jungjunga shibanga aliba lapoktsütsü lemtet, ta AYO tir Kekhrie Pfukha aser tatong tir Neidilhoutuo Sechü nati sangdong ka ajanga metetdaktsü.
State yimtiba nung COVID-19 den raraba maparen nung sorkari tajungtiba nung inyaktsü teimla nung iba telemtetba ya agi.
Tang linük ajunga shibangba shilem tanabuba April 15 nungi May 03 tashi atsülanga lir asünung, sorkari tang nüngdakba meratem tajungtiba nung agia nüburtem taküm kümzüka alitsü asoshi inyaktsü imlar, ta sangdong ajanga ashi.
Iba ama timtema aliba mapang onoki nüngdakba mapangbo onoki sorkar nungita yaritsü renema lir. AYO aser danga telok tsüngda temolung mechitepba ali amai ajitetra, onoki yimti ajunga jungjunga shibangtsü lemtetba ya nüburtem ajungtsü mechi aser sorkari totuyuba agüja aliba tali akangshia inyaktsü atema liasü, ta jangjashitsür.
Asen nüburtem kümzüka ayutsü ya asen mapa lir aser asen nübur aser asen li asoshi onoki akokba tashinung yariteptsü teti renema lir, ta AYO sangdong ajangasa ashi.
Mapa tajung asoshi AYO teti nokdaka aru, tanga nokdaka lir aser tarutsü nunga kasaji nokdaktsü. COVID-19 tongpang akokba nung sorkar aser Nagaland nung aliba nüburtem den benjongtsü onok tejangraba lir. Anungji iba virus anema raraba nung nisung ajak lungjemer nokdaktsü onoki mepishir, ta kasa sangdong ajanga ashi.