AYO-i mokdangba sentong tiptema agiogo; Hombarnüa mokdangtsü

Angami yimtsüng AJAK renema alitsü ayongzüker

Kohima, January 7 (TYO) : Angami Public Organisation (APO) kübok Angami Youth Organisation (AYO)-i Honibarnü Angami nunger lushi nung ghonda 8 ser tesadang mokdangba sentong tiptema agiogo.
AYO-i Kohima district kübok Kohima Municipality aser Dimapur district kübok Chumukedima aser Mediziphema Town Council nung mokdangtsü ayongzüka liasü.
Tanü AYO-i tongtibang tesemtem nung nübotem lemzükja nükdaktsü, aser parnoki gari dang masü saka nisungtem senzüsenbongba-a nokdanga liasü. Külen, Kohima aser Dimapur district administration-ia police aser Indian Reserve Battalion sepaitem mapa lemzüktsü.
Tetsür nem 33% lemzükja urban local bodies indang elections magidaktsütsü ta Angami Public Organisation-i lemtetba pusema AYO-i mokdangba sentong agitsü ayongzük. Tanü ya election nung toktepnürtemi tenüng agütsütsü asoshi tatembangba anogo lir aser yimten telok kar aser candidate temi police teyari agia Returning Officer’s office-i oa tenüng agütsütsü merangtsü akok ta bilemba agi AYO-i Angami nunger lushi nung mokdangba sentong ayongzük.
Ajisüaka, tanü Kohima Municipality aser Chumukedima o Mediziphema Town Council nung party aser candidate shinga tenüng agütsütsü atema maru.
Tanü nisung shingaia tenüng magütsü saka AYO osang ka ajanga ashiba agi, ward ka nung Independent candidate ka atema nisung ka tenüng agütsütsü atema aru saka paji RO office gate nungi AYO lanurtemi meyipa yok.
Tanü state sorkari urban local bodies indang elections atema tenüng agütsüba anogo January 9, 2017 tashi asütsü ta mapang atsülangba telemtetba agibaji ashikülak inyakyim ka lir, ta AYO-i metetdaktsüogo.
Angami nunger yimtsüng ajak aser tain o tanurtem dak alaka tanüngba züngsem AYO den yariteptsü atema renema alitsü ayongzüker, ta AYO president Neinguvoto Krose-i ashi.
Sorkari Naga nunger taginüba anema ashikülaka tenüng agütsüba anogo atsülangba anema AYO-i lokti sentong inyaktsü, ta Krose-isa ashi.
Tesüiba anogo 4 tashi AYO-i sorkar den mangatettep madoktsüsa dang mapa inyaka aruogo saka sorkari tenüng agütsüba anogo atsülangba ajanga parnoki teraksa bener arutsü, sensosangertem yirutsütsü, azü tokshitsü aser kechi südir saka nisung taküma agitsü ta temulungtetba sayur. Anungji, AYO-i Angami yimtsüngtem ajak dang renema atatsü tuyur, ta AYO-isa metetdaktsüogo.
January 9, 2017 anepdang 7:00 ako nungi nikongtsütsü 3:30 ako tashi Kohima aser Medziphema mokdangtsü, ta AYO-isa ashi.
“Onoki taxi, bus aser truck union tem dang anogo ka atema nenok senti rongsen tenlatsü mepishir aser Kohima nung aliba mozükitem dang emergency adok nungbo yariteptsü mepir” ta parnokisa ashi.
Iba mokdangba mapang highway nung garitem senzüba nung timtem magütsütsü aser Wokha, Phek o Imphal highway nung tenokdangba kecha malitsü. Dimapur nungi Imphal-i aoertemi paramedical-Jail colony-New ministers hill-Cathedral-Lerie road ajanga senzütsü metetdaktsür. Maneni Dimapur-Wokha-Phek len senzürtemi Naga Hospital-Naga Bazaar-Census Office-New Sect-Kohima College-DBS lenmang ajanga senzütsü shisemer. Item lenmang anasa aliba colony lanurtemi senzüsenbongertem yaritsü metetdaktsür, ta AYO-isa ashi.
Mokdangba mapang shishilembadak ajak shibangtsü aser nisung o gari shinga mesenzüdaktsütsü. Ajisüaka, medical purposes, paramilitary forces, media aser district administration tembo tenokdangba kübok maiter, saka private aser government garitem nung police tem senzütsü memelatsü, ta AYO-isa metetdaktsü.