AYO-i TCP Gate nungi North PC junction tashi dang mokdangtsü

Kohima, January 8 (TYO): Kohima nung aliba Naga nunger ajak asoshi bilemtsüa, Angami Youth Organization (AYO)-i Hombarnü (January 9) mokdangba sentong ayongzükba nung temelenshi kar akaba metetdaktsüogo.
Mokdangba sentongji Kohima jila ajunga nung masü saka D. Block area dena TCP Gate nungi North P.S Junction tashi lir aser National Highway dena tanga tesemtem nungbo senzüsenbongtettsü, ta Deobar aonung AYO president Neinguvoto-i osangbener dang ashi.
Ajisüaka, temalen shia aliba tesem nung aser jila tongtiba tesem nungbo, nisung aser garitem mesenzüdaktsütsü, ta paisa ashi.
Mokdangba tesem nung pharmacy aser chiyungtsü ayokdakbo (Bakeries & Rice Hotel) lapoktsü saka tanüngba dokantem ajak shibangtsü. Asüng pharmacy aser chiyungtsü ayokdak melapokertem dang tasüngdangba alitsü, ta AYO president Neinguvoto-isa tetuyuba agütsü.
AYO-isa Assam Rifles dang parnok tesepji mokdangba tesem nung densemer, anungji garitem kangabo mesenzütsü atema mepishia metetdaktsüogo.
Naga nunger taginüba atema inyakba mapa nung tanüngba sensotemia pusema nungittsü mepishir, ta Angami Youth Organization-isa ashi.

You must be logged in to post a comment Login