Ayodhya ken o lepa reprangshitsü atema makhangtsü: SWB

Lucknow, Yimpoksüi/November 26 (Agencies): Sunni Central Waqf Board-i, Ayodhya ken o dak sendakba nung Supreme Court-i obendang agütsüba lepa reprangshitsü asoshi masüngdangtsü telemtetba agiogo. Mongolbarnü senden ka nung züngsem tenet densema aliba rongnungi parnok trok-i ken o lepa reprangshitsü atema mebenoktsü pusema liasü.
Ken o lepa reprangshitsü atema benoktsü pusemsang board züngsem Razzaq Khan senden tom nung oadok. Osangbenertem den sensaksemba mapang pai, “züngsem timba kati ken o lepa reprangshitsü memulunger. Onok tenet rongnungi ni dang ken o lepa reprangshitsü mulunga liasü,” ta ashi.
Board nem ali acre pongu agütsüba dak sendakba nung Khan-i ashiba agi, “sorkari ali magütsü tashi ataa alitsü aser iba sülen board senden ka mena telemtetba agitsü.”
Ayodhya ken o dak sendakba nung Supreme Court-i o bendang agütsüba sülen board mendenbuba Zufar Farooqui-i, parnoki ken o kecha lepa merprangshitsü, ta ashi. Paisa, züngsem kari danga ken o lepa reprangshitsü asoshi benokra aji board den sendaktepa mali ta angatettsüla, ta ashi.
Board counsel, Zafaryab Jilani-i Delhi nung Ayodhya ken o dak sendakba nung obendang agütsüba nung tashishitsü aika lir aser onoki lepa reprangshitsü asoshi benoktsü kechiyong onok temulung masür, ta ashiba sülen Farooqui-i iba olen lemsatepa liasü.
Ajisüaka mapang tatsüka lir Jilani-i ken o jangjashija, press conference ya All India Muslim Personal Law Board (AIMPLB)-i ayongzükba lir aser pai Sunni Waqf Board counsel ama masü saka iba lokti secretary ka ama jembiba lir, ta ashi.
Kasa mapang nung AIMPLB-i ken o lepa reprangshitsü atema benoktsü lemtetogo aser ashiba agi, parnok nem ali acre pongu agütsüba parnoki magizüker.
Sunni Waqf Board-i ken o mebenoktsü asoshi telemtetba agiba BJP-i pela shishia agizükogo. Party otongdar Shahnawaz Hussain-i ashiba agi, “ni Sunni Waqf Board telemtetba pelashishia agizüker. Iba ya linük tejangraba ka lir aser linük tesünep nung toktsütsü nükjidong nung agi.”