Ayodhya nung Muslim nunger tsübuteper, saka yimti medoktsüner

Ayodhya, Yimpoksüi/November 24 (Agencies): Ayodhya yimti ya Vishva Hindu Parishad aser Shiv Sena lenirtem atema mitsa ka mesüka küma parnoki Ram tekülem ki yanglutsü atema khangdar.
Amongnü Vishwa Hindu Parishad teloki Ayodhya nung ‘Dharam Sabha’ ayongzüka lir aser Shiv Sena tongti, Udhav Thakarey-ia anogo ananü atema Ayodhya semdanga lir.
Item sentong nung adentsü atema saffron party tem yimti nung kanga longsoa adenshidang yimti nung aliba Muslim nungerbo tsübutepdar, saka parnoki yimti toktsür mouner.
Babri mosque plaintiff, Iqbal Ansari-i, “Yimti nung Muslim nungeri tesünep aginer. Ayodhya nung nisungtem adenshira koma asütsü? Nisungtemi yimti nung aliba timtem balala angatettsüla,” ta ashi.
Ano yimti nung alir ka tenüng agi, Mohammad Iqbal-i, tanü iba tensa ya akhi tensa den mesükteper, ta ashi.
Paisa, saffron party tem adenshiaka onoki yimti toktsür maotsü, ta ashi.
Paisa, “Ayodhya nung kecha mataloktsü. VHP züngsemtemi tekülem ki yanglutsü ta ashir, saka kodang yanglutsüar mashir. Iba ya vote angutsü atema politics asayar dang lir. Ayodhya ya timtem ataloktsüsa aliba yimti ka lir, anungji nisung jenti yangi madenshidaktsütsüla. Parnoki lokti senden tulu linüra yimti tezülen ayonga akatsüla,” ta ashi.
Ajisüaka Mohammad Sadiq-ibo, Muslim nunger karbo kanga tsübuteper, kechiyong parnoki 1990 aser 1992 küm atalokbatem, aser Babri Masjid raksatsüba sülen atalokbatem tu bilemteter, ta ashi.
Paisa, Muslim nunger karibo parnok chinurtem taküm kümzüktsü atema tangaleni yokogo, ta metetdaktsü.
Asüng Dharam Sabha agitsü lia VHP-i pamphlet ka ajanga “Onoki Ram tenüng nung pa atema tekülem ki tajung ka yanglutsütsü nangzüker,” ta shia nüburtem dang iba mapatong nung adentsü tayongzükba agutsüogo.
Uttar Pradesh Police otongdar kati, Additional DGP ka, (DIG) ka, Senior Superintendents of Police (SSPs) asem, additional SPs asem, deputy SPs 21, inspector 160, constables 700, PAC company 42, RAF, ATS commandos company 5 aser drones yimti nung lemzüktsüogo, ta metetdaktsü.