Ayong merüka ayuba

Meilongi, meilongi asenoka asen ki kilong dang masü saka kima yimdong dena merüka ayuba nung kanga junga kümdagi. Ibaji tanü putu nung atalokba temelenshi ka asütsü. Yashi tashi asenoki asen ki kilong merüka ayuba dak alaka kima yimdong merüka ayutsübajibo asen mapa masü amai bilema liogo. Ibayongji, asenoki asen kilong merük dang bendenba janaona ajak kima yimdong mashimashi nung endokba agi asenok alidak temeketbo tesempatsüka topur mejungi kümdaktsüba asenoki ajangshia aruogo. Atangji, tanga tesem kar nungbo kiyongertemi junga mebilemdangi pei kidang okzükba janaona ajak bendena tangar kimalen endokba mesüra kilentsü nung enoka yutsüba angur. Aji oda, motzü odaktsütsü atema kilentsü merüka ayutsü melen asenoki kilentsü nunga janaona enoka yutsüba agi, tang ama, tzünglu aruba mapang kilentsü nokdangadoker lenmang lenjang nung motzü ayimer aser lenmang raksar. Ibaji tezüdangtsüka lir.  Item yimya awashi memetetba aser merajemba ajakji asenok rongnung kati ka ajungshitepa tangatetba agütsütsübaji kanga tongtibang kümogo. Iba dakji alaka ano, asenoki mebilemdangi inyakba mapa kaji janaona bendena bener oa ayong nung endokba yimya ya asütsü. Tanü India nung kanga süoki ia jembiba aser inyakba mapa kaji Ganga aser Bramaputra ayongtem ama merüktetba mapatem asütsü.Nisungtem asoshi ayong ya kanga tongtibang ser nung asenoki kecha hau ta mali mashimashi menendaktsür. Aji oda, tesem aika nung yimteni dena town nung bendenba janaona ajak gari nung  bener oa ayong nung endokba angur. Ibaji India len nungi arur kari angu nungbo asenoki memeteti parnok tsüngdang asenok kanga alutsüba mapa ka lir. Ibaji dang masü saka asenok chidiyongdinüdang asenoki ayong nung aliba taküm ajak samatsüsa miim mozü amshir. Ano, tanübo asenok ali telong nung akaba rongsen meteta aküm nungji, ayong anasa mijang atuba agi ayong tzüji dena tajemtsü makoktsüsa asenoki miim kümdaktsüdagi. Item ama meteta aser memeteti asenoki asenok akoksatsüsa  inyakba mapatem rajema tangatetba tajung kati arutsü mapang tongogo. Atangji, tesem aika nung mapang mapang shia yim nübodoka kima yimdong aser kilentsü merüker aser ano janaona endoktsü asoshi bendenba yima tapu balala apiteta inyaker. Ajisüaka, kanga tngtibang kaji item janaji kong bener oa endoker (?) ta asübaji lir. Asenoki asen alidak nungi janaona bendena bener oa ayong nung endokra mesüra lenmang nung jajartem teni nembanger süitsüsa lenmang lendi anasa endokra, ibajiang tamajungba asütsü. Aji oda, akok tashi pei ki aser pei kima janaba janaona bendena pei atsüki nung jana rongdokdak yanglua yur yangji polythene aser mica ama ali küma maotsübatem rongdoker, ali küma aotsüba janatembo  ongken tur yangji bendenra, janaona bendena endokba yimya ajak dang tajungtibaji aji asütsü. Ano, yimtenia janaona bendena endokba yimyaji yim nungi talangka pilar tesem ka shimteta yangji terongdoktsü tashi rongdoktsü aser tebendentsü tashi ongken tur yangji endokra, iba jagi tzü mopong menenba mapatem nungi tuluka kümzüktsü. Atangji, tanü putu yabo janaona dena teindoktsüla mali, kechisarina agi tanaben meyipa tagitarutsü yanglua amshiba putu lir. Aji oda, kaket tamajungtem agi ano tanaben kaket yanglur amshir, yin aser plastic tamajungtem bendena tagitarutsü oset küma yanglur amshir aser ali akümtsüba janaonatem agi ali temo kümdaktsür aluyimba nung amshir. Item inyakyim ajungaji lanurtemi angazüka inyaktsüla. Iba jagi asen lima nung tzü mopong memenenba dang masü saka arem kümzüktettsü aser asen alidak aser temeket kiyong aser yim kanga topur junga akümtsü. Nisungtem dak tangatetba aser pei lima meimba shisatsü alibaji pei kilong, kima aser yimdong merüka ayuba nungi tangar süisüpongertemi metetter. Iba jagi asenoki memeteti tangar nungi akümtsübu angur.