Ayusangla Jamir-i Miss Mokokchung takok angu

Miss Mokokchung 2015 Ayusangla Jamir (tiyong), 1st runner-up, Jungtimenla Jamir (ajichilen) aser 2nd runner-up Yangerjungla Pongen nunger noksa nung angur. (Mokokchung, Nov 06, 2015).

Dimapur, November 6 (TYO) : Miss Mokokchung 2015 tetoktepba nung arishi küm 17 tain Ayusangla Jamir-i takok korang nguogo.
Hokolbar nikongtsütsü Town Hall Mokokchung nung Miss Mokokchung 2015 tetoktepba ayongzüka agi aser Parliamentary Secretary C Apok Jamir tongti tesemdanger liasü.
Anosa, Padmashree Chubalemla aser Banuo Z Jamir (mezüngbuba tetsür IAS, chief secretary Nagaland & MAAM patron) na den tongti nisung aika iba sentong nung denogo.
Taküm tetoktepba nung tanabuba jenjang nung Jungtimenla Jamir aser tasembuiba jenjang nung Yangerjungla Pongen nati takok angu.
Sentong nung C Apok Jamir-i o jembidang, lanurtem dang pei dak tamang katettsü aser iba tamang katetbaji lokti nung tangar daka ketdaktsütsü tayongzükba agütsü.
Taoba Miss Nagaland aser Padmashree Chubalemla-i sentong nung ken tajung ka atenba ajanga tetoktepertem ajungmeso.
“Nenok tetoktepertem ajak tobur tajung ta angatettsüla. Iba ya tobur ajung tetoktepba ka asünung takok anguri tebilemtsü khuret talila benloker liyonga aotsüla aser takok korang akhüm meraksatsüla” ta laisa ayongzük.
Taküm Miss Mokokchung tetoktepba atema tetendangertemji choreographer Adang Jamir (chief judge), Reggie Shira, Asola Imkong aser Dr Temsumenla Longkumer nungertem liasü.