Ayushman Bharat Scheme ajanga nisung lakh 6 tajangzük nguogo: Tir

Karimnagar (Telangana), Luchii/December 22 (Agencies): Tanü linük Tir, Ram Nath Kovind-i NDA sorkari flagship health insurance programme Ayushman Bharat tenzükba atema tenüngsang agutsüogo.
Tiri, iba scheme nükjidong ya senotsü maliba ajanga nisungtemi healthcare magitetba timtem malitsü atema lir, ta ashi.
Kovind-i healthcare jenjang ajungkettsü atema linük tesem ajaklen public, municipal, charitable hospitals, primary health aser wellness clinics tashi itshitsü nüngdaker, ta ashi.
Tanü Telangana kübok Karimnagar nung sentong ka nung jembidang Kovind-i, “Healthcare tsütsü tayongzükba aika lir, yamaji asenoki inyaktetbatem-a aika lir. Senotsü maliba ajanga temang anepalu mesütetba malitsü nükjidong nung Ayushman Bharat mapatong ya tenzük,” ta pai metetdaktsü.
Kovind-isa, “Iba scheme tenzükba sülen mezüngbuba ita asem nung nisung lakh 6-i tajangzük nguogo, aser parnok temang anepalutsü atema sen crore 800 lemzükja liasü,” ta metetdaktsü.
Iba scheme ya taküm September ita nung Ato kilonser, Narendra Modi-i tenzüktsü, aser iba scheme ya alima nung sorkar indang healthcare programme tulutiba lir, ta züngshir.
Tirisa, medical advancement aser libaliro jenjang tajungba akumba ajanga India nunger nüchiso anguba sülen average life expectancy anasü agi tajungba kümogo, ta metetdaktsü.
Tiri, healthcare index tsütsü India tejakleni ogo ajisüaka lenla ajungalen healthcare system ajangzüktettsü atema ano mapang talangka lir, ta ashi.
Healthcare ji yimti/jila aser yimtsüng naprong nung liromedema ngutettsüla, ta paisa ashi.
Healthcare tebilemtsü bentettsü atema target groups nem awareness agutsütsüla aser mapang shidak nung counseling agutsütsüla, ta pai shisem.
Tanü iba sentong nung Andhra Pradesh aser Telangana Angh, ESL Narasimhan aser Maharashtra Angh, Ch Vidyasagar Rao nati o tatsütsü jembia liasü.